Երևանում և ՀՀ մարզերում 2018-2024 թվականներին կկառուցվեն անվճար հիմունքներով գործող ուսուցողական-մարզումային հրաձգարաններ և վճարովի հիմունքներով գործող ժամանցային հրաձգարաններ (տիր), որտեղ [քաղաքացիները] կծանոթանան զենքին, կսովորեն նշանառել ու կրակել, պարբերաբար կանցկացնեն վարժանքներ:
Այս մասին նշվում է «Հրաձգություն մարզաձևի զարգացման հայեցակարգում», որը դեկտեմբերի 21-ի նիստում ընդունել է ՀՀ կառավարությունը, հայտնում է կառավարության կայքը:
Ավելի վաղ՝ դեկտեմբերի 23-ին, ՀՀ սպորտի և երիտասարդության հարցերի նախարարն «Արմենպրեսին» հայտնել էր, որ «Ամենակարևորն այն է, որ մեր բոլոր երեխաները կիմանան զենքի հետ ճիշտ վարվելու և ճիշտ նշան բռնելու կանոնները»։
Կառավարության՝ այսօր ընդունած հայեցակարգով սահմանված նախապայմաններից է ուսումնական հաստատություններում կրակելու հմտությունների ուսուցանում նախնական զինվորական պատրաստության (ՆԶՊ) դասաժամերին: ՆԶՊ առարկան պետք է ուսուցանվի տղաներին և աղջիկներին համահավասար կերպով:
Սովորողները պետք է տարեկան երկու անգամ հաճախեն հրաձգարան և յուրաքանչյուր սովորող կրակի 10-ական փամփուշտ:
Ուսումնական հաստատությունների սովորողների կրակելու ուսումնառության գործընթացը պետք է իրականացվի նոր կառուցվող և վերանորոգվող հրաձգարաններում՝ համագործակցելով ՀՀ ՊՆ որոշակի զորամասերի հետ և համատեղ օգտագործելով զորամասերում առկա ուսումնանյութական բազան:
Նախագծի նպատակն է ՀՀ֊ում հրաձգություն մարզաձևի զարգացման խթանումը, ինչպես թելադրում է ՀՀ֊ում տիրող ներկա աշխարհաքաղաքական իրավիճակը:
Նախագիծը ներկայացնում է խնդիրներ, որոնք են՝
- գործող հրաձգարանների սակավությունը
- սահմանամերձ շրջաններում հրաձգարանների բացակայությունը.
- Գյումրու և Վանաձորի ակտիվորեն գործող հրաձգարանների ավանդույթի վերականգնումը.
- մարզական հերթափոխի պատրաստումը.
- մասնագետների վերապատրաստումը.
- եղած հրաձգարանների վերանորոգման և զենքով ու զինամթերքով ապահովելու անհրաժեշտությունը.
- սպորտի բարձրագույն նվաճումների ձեռքբերումը:
Փաստաթղթով նախատեսում է նաև եղած հրաձգարանների վերանորոգում, զինամթերքով ապահովում: Անհրաժեշտություն կա վերանորոգել տարեկան երեքից չորս հրաձգարան:
Pingback: ՀՀ պետական մարմինների աշխատակիցների միջև անցկացվում են հրաձգության մրցումներ | Ռազմ.info