Իրավիճակն Արցախի առաջնագծում. օպերատիվ լրահոս. 08.04.2016

21:54
Արցախի փոխվարչապետ Արթուր Աղաբեկյանն իր ֆեյսնուքի էջում գրել է, որ Արցախի կառավարության բացած հատուկ հաշվեհամարին ուղարկված գումարն ուղղվելու է բացառապես զինված ուժերի համար սպառազինությունների ձեռքբերմանը:

Մեկ այլ գրառման մեջ Արթուր Աղաբեկյանը ներկայացրել է հաշվեհամարում արդեն հավաքված գումարի չափը.

• 891 583 119 ՀՀ դրամ
• 63 707 ԱՄՆ դոլար
• 1 938 եվրո
• 11 238 600 ՌԴ ռուբլի

21:30

ՀՀ ՊՆ կայքը հայտնում է.

Ապրիլի 8-ին ՀՀ ՊՆ-ում պաշտպանության նախարար Սեյրան Օհանյանն ընդունել է Մինսկի խմբի համանախագահներ Իգոր Պոպովին, Ջեյմս Ուորլիքին և Պիեռ Անդիոյին: Հանդիպմանը ներկա էր նաև ԵԱՀԿ գործող նախագահի անձնական ներկայացուցիչ Անջեյ Կասպրշչիկը:

Հանդիպմանը Սեյրան Օհանյանն ընդգծվել է, որ Հայաստանի Հանրապետությունը, չնայած ճշգրիտ թիրախավորման և նոր բարենպաստ բնագծերի զբաղեցման միջոցով հակառակորդի սանձահարմանը ներգավվելու պատրաստականությանը, դեռևս շարունակում է ապավինել Արցախի հակամարտության բանակցային կարգավորմանը:

Որպես հակամարտության շուրջ ձևավորված զինված դիմակայության թուլացման նախապայման` պաշտպանության նախարարը կարևորել է ցանկացած հրադադար իրավաբանորեն պարտավորեցնող համաձայնագրով ամրապնդելու հրամայականը:

20:55
Ադրբեջանցի գերմանաբնակ բլոգգեր, Meydan.tv ընդդիմադիր լրատվակայքի համակարգող Հաբիբ Աբդուլլաևը, թարմացրնելով իր` երեկ` ապրիլի 7-ին տված ցուցակը, ներկայացրել է Ադրբեջանի կորուստների՝ 66 սպանվածի և 5 անհետ կորածի անուն, կրկին թույլ տալով սակայն մի շարք սխալներ:Համադրելով այդ տվյալները Razm.info-ի գրանցածների հետ և զտելով դրանք` ներկայացնում ենք Ադրբեջանի սպանվածների և անհետ կորածների ճշտված՝ 66 + 7 անունից բաղկացած ցուցակ։ Դրանց թվում են 1 գնդապետ, 1 փոխգնդապետ, 5 մայոր, 2 կապիտան, 5 ավագ լեյտենանտ և 3 լեյտենանտ։ Ցուցակագրվածների մեծ մասը հատուկջոկատայիններ և հետախույզներ են:

18:18
ՀՀ ՊՆ կայքը հայտնում է.
Ապրիլի 8-ից քաղաքացիների հուզող հարցերին օպերատիվ կարգով արձագանքելու նպատակով ՀՀ պաշտպանության նախարարությունում գործում են հետևյալ շուրջօրյա հեռախոսահամարները.

• զինծառայողների առողջական վիճակի հետ կապված հարցերի պարզաբանումների համար — 010 29-46-45,
• զինանձնակազմի հետ կապված հարցերի պարզաբանումների համար – 010 29-44-25, 010 29-45-57,
• զինծառայողների և նրանց ընտանիքների սոցիալական խնդիրների հետ կապված հարցերի պարզաբանումների համար — 010-20-64-59,
• զինվորական իրավախախտումների հետ կապված հարցերի համար — 010 77-05-80,
• լրատվամիջոցների հետ կապի համար — 010 29-46-99, 010 29-46-38:

17:40

16:54
ՀՀ քննչական կոմիտեի կայքը ներկայացրել է Արմաշ գյուղի մոտ զինվորական մեքենայի վթարի մանրամասները.08.04.2016թ.` ժամը 11:00-ի սահմաններում, ՀՀ ՊՆ N զորամասի «Ուրալ» մակնիշի ավտոմեքենան Արարատի մարզի Արմաշ գյուղ տանող ավտոճանապարհին դուրս է եկել ճանապարհի երթևեկելի մասից և շուրջ 200 մետր գլորվել ձորը:

Ավտոմեքենայում գտնվել է 11 զինծառայող, որոնցից պարտադիր ժամկետային զինծառայող, շարքային Վարդան Լևիկի Մաթևոսյանը տեղում մահացել է, 6-ը՝ տարբեր աստիճանի մարմնական վնասվածքներով, տեղափոխվել Արարատի բժշկական կենտրոն: Մյուս 4 զինծառայողներին հոսպիտալացնելու անհրաժեշտություն չի եղել։

Դեպքի առթիվ ՀՀ քննչական կոմիտեի ԶՔԳՎ ութերորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 377-րդ հոդվածի 2-րդ մասով (Մարտական, հատուկ կամ տրանսպորտային մեքենաներ վարելու կամ շահագործելու կանոնները խախտելը, որն անզգուշությամբ առաջացրել է մարդու մահ), կատարվել է դեպքի վայրի զննություն։ Քննություն է տարվում՝ պարզելու վթարի պատճառները:

16։15
Հայաստանյան Մեդիամաքս լրատվական գործակալությունը տեղեկացնում է, որ ադրբեջանական կողմի հետ ձեռք բերված պայմանավորվածության համաձայն՝ այսօր ժամը 15:00-20:00-ը ընկած ժամանակահատվածում, Արցախում շփման գծի հյուսիսային և հարավային ուղղություններում իրականացվում են երկու կողմերի զոհված զինծառայողների մարմինների որոնողական աշխատանքները՝ միաժամանակ ապահովելով կրակի դադարեցման ռեժիմ:Այս մասին հաստատել է ՊԲ մամուլի խոսնակ Սենոր Հասրաթյանը: Վերջինս նշել է նաև, որ գործընթացը համակարգում են Կարմիր Խաչի միջազգային կոմիտեն և ԵԱՀԿ Մինսկի խմբի հատուկ ներկայացուցչի դաշտային օգնականները:

14։40

Պաշտպանության բանակի մամուլի ծառայությունը հայտնում է, որ երեկ՝ ապրիլի 7-ին ժամը 23:00-ի սահմաններում Արցախի երկնքում ՊԲ հակաօդայինները խոցել են հակառակորդի հերթական գրոհային անօդաչու թռչող սարքը:

12։14
ՀՀ ՊՆ մամուլի քարտուղար Արծրուն Հովհաննիսյանը հրապարակել է ապրիլի 2-8-ն ընկած ժամանակահատվածում Արցախում մարտերի ժամանակ զոհված 44 զինծառայողների անունները։

09:55

09:39
ՊԲ մամուլի ծառայությունը հայտնում է. Ապրիլի 7-ի լույս 8-ի գիշերը հայ-ադրբեջանական հակամարտ զորքերի շփման գծի ողջ երկայնքով հակառակորդը շարունակել է խախտել կրակի դադարեցման շուրջ ձեռք բերված պայմանավորվածությունը:Առավել ինտենսիվ խախտումներ են արձանագրվել հյուսիսային (Թալիշ) ուղղությամբ, որոնց հետևանքով զոհվել է շարքային պայմանագրային, 1983թ. ծնված Հրաչ Սամվելի Մուրադյանը: Կան վիրավորներ:Առաջնագծի մեկ այլ՝ հյուսիսարևելյան հատվածում, դեռևս լրիվությամբ չպարզված հանգամանքներում, մահացու հրազենային վիրավորում է ստացել 1996թ. ծնված շարքային զինծառայող Գևորգ Աշոտի Մղդեսյանը:

02:23
Ժամեր առաջ ադրբեջանցի գերմանաբնակ բլոգգեր, Meydan.tv ընդդիմադիր լրատվակայքի համակարգող Հաբիբ Աբդուլլաևը հրապարակել է Ադրբեջանի կորուստների՝ 64 սպանվածի և 4 անհետ կորածի անուն պարունակող ցուցակ, թույլ տալով սակայն մի շարք սխալներ:Համադրելով այդ տվյալները Razm.info-ի գրանցածների հետ և զտելով դրանք` ներկայացնում ենք Ադրբեջանի սպանվածների և անհետ կորածների ճշտված՝ 61 + 5 անունից բաղկացած ցուցակ։ Դրանց թվում են 1 գնդապետ, 1 փոխգնդապետ, 4 մայոր, 2 կապիտան, 5 ավագ լեյտենանտ և 2 լեյտենանտ։ Ցուցակագրվածների մեծ մասը հատուկջոկատայիններ և հետախույզներ են:

02:06
ՊԲ կայքը հրապարակել է 2016թ. ապրիլի 2-ից 5-ը Արցախի շփման գծում մարտական գործողությունների ժամանակ Հայրենիքը պաշտպանելիս զոհված ՊԲ 36 զինծառայողների անունները: