Փետրվարի 1-ին ՀՀ նախագահ Սերժ Սարգսյանն այսօր ընդունել է պաշտոնական այցով Հայաստան ժամանած Վրաստանի պաշտպանության նախարար Թինաթին Խիդաշելիին: Այս մասին տեղեկացնում է ՀՀ նախագահի կայքը:
Հայաստանի նախագահ Սերժ Սարգսյանի հանդիպումը Վրաստանի պաշտպանության նախարար Թինա Խիդաշելիի հետ
Զրուցակիցները քննարկել են երկկողմ միջպետական հարաբերությունների զարգացմանն ու ամրապնդմանը, պաշտպանության բնագավառում հայ-վրացական փոխգործակցությանը և տարածաշրջանային անվտանգությանը վերաբերող հարցեր:
Հանդիպմանը Հայաստանի և Վրաստանի պաշտպանության նախարարները ՀՀ Նախագահին ներկայացրել են նախարար Թինաթին Խիդաշելիի այցի շրջանակներում հայ-վրացական ռազմական համագործակցության ուղղությամբ միջգերատեսչական քննարկումների արդյունքում ձեռքբերված պայմանավորվածությունները:
Նույն օրը՝ փետրվարի 1-ին, Վրաստանի պաշտպանության նախարարին ընդունել է ՀՀ վարչապետ Հովիկ Աբրահամյանը, հայտնում է ՀՀ կառավարության կայքը:
Ընդգծելով, որ Հայաստանի և Վրաստանի քաղաքական ու տնտեսական հարաբերությունները գտնվում են բարձր հիմքերի վրա՝ Հովիկ Աբրահամյանը կարևորել է համագործակցության զարգացումը նաև պաշտպանական ոլորտում, ինչը կամրապնդի ինչպես երկու բարեկամ պետությունների, այնպես էլ ողջ տարածաշրջանի անվտանգությունը:
Հայաստանի վարչապետի հանդիպումը Վրաստանի պաշտպանության նախարարի հետ
Թինա Խիդաշելին շնորհակալություն է հայտնել ՀՀ վարչապետին և նշել, որ պաշտպանական բնագավառում Հայաստանի ու Վրաստանի փոխգործակցությունը ծավալվում է ոչ միայն երկկողմ ձևաչափում, այլ նաև ՆԱՏՕ-ի խաղաղապահ առաքելության շրջանակում:
Փետրվարի 2-ին Վրաստանի պաշտպանության նախարարին ընդունել է նաև ՀՀ Ազգային ժողովի նախագահ Գալուստ Սահակյանը, հայտնում է ՀՀ ԱԺ կայքը:
Գալուստ Սահակյանը բարձր է գնահատել Հայաստանի և Վրաստանի համագործակցությունը ռազմական ոլորտում և կարծիք հայտնել, որ Վրաստանի՝ Թուրքիայի և Ադրբեջանի հետ ունեցած պայմանավորվածությունները ռազմաարդյունաբերական ոլորտում չեն խանգարի հայ-վրացական համատեղ ծրագրերի իրականացմանն այդ բնագավառում:
Ավելացնենք, որ Վրաստանի պաշտպանության նախարարը Հայաստան է այցելել հենց փետրվարի 1-ին: Նույն օրը նրան ընդունել է ՀՀ պաշտպանության նախարարը, ինչից հետո ստորագրվել է Հայաստանի և Վրաստանի պաշտպանության նախարարությունների միջև 2016թ. պաշտպանական համագործակցության պլանը:
Նշենք, որ Վրաստանի պաշտպանության նախարարն այսօր՝ փետրվարի 2-ին, Ռազմինֆոյի հետ բացառիկ հարցազրույցի ժամանակ հայտնել է, որ Վրաստանի՝ Ադրբեջանին ականանետներ և նռնականետներ վաճառելու մասին օրերս տարածված լուրն ապատեղեկատվություն է եղել: