Թուրքիայի ԶՈւ-ում ավելանում է պրոֆեսիոնալ զինծառայողների թվաքանակը

Թուրքիայի ԶՈւ ԳՇ կայքը հունվարի 4-ին հրապարակել է զինված ուժերի թվաքանակի մասին տվյալները, ըստ որոնց՝ ԶՈւ անձնակազմը 626․004 է, ինչը շուրջ 13 հազարով ավելի է 2015-ի դեկտեմբերին հրապարակված ցուցանիշից (612․862), սակայն 13,5 հազարով պակաս նոյեմբերին հրապարակված ցուցանիշից (639․511): Տվյալները հրապարակվել են Թուրքիայի ԶՈւ ԳՇ կայքում։

Թուրքիայի ԶՈւ զինծառայողներ

Թուրքական զինուժում գեներալների և ծովակալների թիվը 358 է, որից 325-ը՝ ցամաքային, ռազմաօդային և ռազմածովային ուժերում, 32-ը՝ ժանդարմերիայում, 1-ը՝ առափնյա անվտանգության ուժերում։ Օգոստոսից ի վեր գեներալների թվաքանակը նվազել է միայն մեկով, իսկ օգոստոսին ավելացել էր 13-ով՝ կապված զինված ուժերի հրամանատարական կազմի փոփոխության և նոր գեներալների նշանակման հետ։

Սպաների ընդհանուր թիվը 39․471 է, որից 32․597-ը՝ ցամաքային, ռազմաօդային և ռազմածովային ուժերում, 6517-ը՝ ժանդարմերիայում, 668-ը՝ առափնյա անվտանգության ուժերում։ Սպաների թվաքանակը վերջին մեկ ամսվա ընթացքում գրեթե փոփոխության չի ենթարկվել։

Ենթասպաների (կրտսեր հրամանատարական կազմ) ընդհանուր կազմը 97․110 է, որից 70․111-ը՝ ցամաքային, ռազմաօդային և ռազմածովային ուժերում, 25․423-ը՝ ժանդարմերիայում, 1576-ը՝ առափնյա անվտանգության ուժերում։ Ենթասպաների ընդհանուր թվաքանակը վերջին մեկ ամսվա ընթացքում ևս զգալի փոփոխություններ չի կրել։

Պայմանագրային ժանդարմների ընդհանուր քանակը 21․978 է, պայմանագրային եֆրեյտորների և շարքայինների թիվը՝ 8538, որից 73-ը առափնյա անվտանգության ուժերում, իսկ 8611-ը՝ ցամաքային զորքերում։ Նախորդ ամսվա համեմատ՝ պայմանագրային եֆրեյտորների և շարքայինների թվաքանակն ավելացել է 484-ով։

Հատուկ պայմանագրային եֆրեյտորների ընդհանուր քանակը 73․975 է, որից 48․579-ը՝ ցամաքային, ռազմաօդային և ռազմածովային ուժերում, 24․734-ը՝ ժանդարմերիայում, 662-ը՝ առափնյա անվտանգության ուժերում։ Հատուկ պայմանագրային եֆրեյտորների թվաքանակն ավելացել է շուրջ 3 հազարով, որից շուրջ 2300-ը ժանդարմերիայում։ Նկատելի է, որ վերջին ամիսներին Թուրքիայի զինված ուժերում ավելանում է պրոֆեսիոնալ զինծառայողների թվաքանակը: Հավելենք, որ պրոֆեսիոնալ զինծառայողների ընդհանուր թվաքանակը 241․814 է, որը ԶՈւ ընդհանուր թվաքանաի շուրջ 42 %-ն է:

Պարտադիր զինծառայություն անցնողների ընդհանուր թվաքանակը 332․509 (դեկտեմբերին ներկայացված տվյալներով՝ 322․706 , իսկ նոյեմբերին՝ 350․695 ) է, որից 243․892 (238․864)-ը՝ ցամաքային, ռազմաօդային և ռազմածովային ուժերում, 87․088 (82․538)-ը՝ ժանդարմերիայում, 1529 (1304)-ը՝ առափնյա անվտանգության ուժերում։ Նոխորդ ամսին ներկայացված տվյաների համեմատ պարտադիր զինծառայություն անցնողների թվաքանակն ավելացել է 9803-ով, ինչը կապված է զորահավաքի հետ։

Սակայն ավելացնենք, որ նոյեմբերին հրապարակված ցուցանիշների համեմատությամբ պարտադիր զինծառայություն անցնողների թվաքանակն ընդհանուր առմամբ նվազել է 18․186-ով, հուլիսի համեմատ՝ շուրջ 30 հազարով, իսկ հունիսին հրապարակված ցուցանիշի համեմատ` շուրջ 58 հազարով։

Քաղաքացիական ծառայողների և աշխատողների քանակը 51․681 է, որից 47․283-ը՝ ցամաքային, ռազմաօդային և ռազմածովային ուժերում, 3477-ը՝ ժանդարմերիայում, 921-ը՝ առափնյա անվտանգության ուժերում։ Այս ցուցանիշներում շոշափելի փոփոխություններ չկան։

Այսպիսով, Թուրքիայի ԶՈւ-ի ընդհանուր թվաքանակը 626․004 (Նոյեմբերին ներկայացված տվյալներով` 612․862) է, որից 451․325-ը (445․248)՝ ցամաքային, ռազմաօդային և ռազմածովային ուժերում, 169․249-ը (162․443)՝ ժանդարմերիայում, 5430-ը (5171)՝ առափնյա անվտանգության ուժերում։

ԶՈւ ընդհանուր թվաքանակը նախորդ ամսվա համեմատ ավելացել է 13․142-ով։ Ցամաքային, ռազմաօդային և ռազմածովային ուժերում զինծառայողների թվաքանակը ավելացել է  շուրջ 6 հազարով, ժանդարմերիայում ՝շուրջ 7 հազարով։

Պրոֆեսիոնալ զինծառայողներ են ընդհանուր զինուժի 42 տոկոսը։ Ցամաքային, ռազմաօդային, ռազմածովային ուժերում պրոֆեսիոնալ հիմունքներով է ծառայում զինծառայողների 40 տոկոսը, ժանդարմերիայում՝ 48 տոկոսը, իսկ առափնյա անվտանգության ուժերում՝ 66 տոկոսը։