«Էրեբունու» ավիախումբը ՄիԳ-29 ինքնաթիռներ կստանա 2016-ին

Հայաստանի «Էրեբունի» օդանավակայանում տեղակայված ռուսաստանյան ավիաբազան 2016-ին համալրվելու է վերանորոգված ՄիԳ-29 կործանիչներով (քանակը չի նշվում) և մեկ Մի-8 բեռնատար ուղղաթիռով։ Այս մասին տեղեկացնում է ՌԴ ՊՆ կայքը։

ՄիԳ-29 կործանիչները Երևանի «Էրեբունի» օդանավակայանում թռիչքի ժամանակ

Հաղորդագրության համաձայն՝ ինքնաթիռների և ուղղաթիռների հավաքման, սպասարկման և պահպանման համար անհրաժեշտ ենթակառուցվածքը սարքավորվելու է տոներից հետո։

Ինչպես և արդեն ավիաբազայում եղած կործանիչները, այստեղ տեղափոխվող նոր խմբաքանակը նույնպես ծառայելու է Հայաստանի օդային տարածքի պաշտպանությանը՝ ԱՊՀ միացյալ ՀՕՊ համակարգի շրջանակներում։

Նույն նպատակով 2015-ի դեկտեմբերին ավիաբազան համալրվել է նաև հարվածային և բեռնատար ուղղաթիռներով՝ 7 միավոր և 6 միավոր խմբաքանակներով։

Ավելացնենք, որ Երևանի «Էրեբունի» օդանավակայանում տեղակայված ռուսաստանյան ավիաբազան Ռուսաստանի ԶՈւ Հարավային ռազմական շրջանի մեջ մտնող, Գյումրիում տեղակայված 102-րդ ռազմաբազայի կազմում է, որը ՀՀ-ում տեղակայվել է 1995 թվականին Հայաստանի ու Ռուսաստանի միջպետական համաձայնագրով:

Ռազմական օդանավակայանը համատեղ օգտագործում են ՀՀ ԶՈւ-ի ստորաբաժանումները և ՀՀ-ում տեղակայված ռուսաստանյան ռազմաբազան։ «Էրեբունիում» են կայանում հայկական զինուժի Մի-8 և Մի-24 ուղղաթիռներ, ինչպես նաև ռուսաստանյան ռազմաբազայի ՄիԳ-29 կործանիչները, Մի-24Պ հարվածային և Մի-8ՄՏ բեռնատար ուղղաթիռները։

«Էրեբունիում» տեղակայված ՌԴ ավիաբազան մարտական հերթապահություն է կրում ԱՊՀ անդամ պետություների Միացյալ ՀՕՊ համակարգի կազմում։