ՆԱՏՕ-ի անդամները պատրաստվում են ընդլայնել օգնությունը Թուրքիային

ՆԱՏՕ-ի գլխավոր քարտուղար Յենս Ստոլտենբերգը դեկտեմբերի 1-ին հայտարարել է, որ Դաշինքը պատրաստվում է օժանդակել Թուրքիային օդային սահմանների պաշտպանության հարցում և այդ նպատակով գործողությունների նոր փաթեթ է մշակում։ Այս մասին Ստոլտենբերգի հայտարարությունը տեղադրված է ՆԱՏՕ-ի պաշտոնական կայքում։

Իսպանիայի զինված ուժերի Patriot ՀՕՊ համակարգի արձակման կայանը՝ Ադանայի օդային տարածքը հսկելիս

Դեկտեմբերի 1-ին Բրյուսելում ՆԱՏՕ-ի անդամ երկրների արտգործնախարարների ժողովից հետո Դաշինքի գլխավոր քարտուղարը պատասխանել է լրագրողների հարցերին և մասնավորապես նշել, որ ՆԱՏՕ-ն արդեն տասնամյակներ շարունակ օժանդակում է Թուրքիային, իսկ վերջին տարիներին շարունակում է մեծացնել իր օգնությունը՝ Թուրքիայի օդային սահմանների պաշտպանության հարցում։

Ստոլտենբերգը նշել է, որ կառույցը շարունակելու է ակտիվացնել իր մասնակցությունը Թուրքիայի օդային սահմանների պաշտպանության հարցում՝ տեղակայելով հակաօդային պաշտպանությունն ապահովող նոր ուժեր: Ստոլտենբերգը շեշտել է, որ դա ամենևին կապված չէ ռուսական ռմբակոծիչի կործանման հետ, և որոշումն ընդունվել է այդ միջադեպից առաջ։

Նա հիշեցրել է, որ Իսպանիան այժմ Թուրքիայում ունի Patriot ՀՕՊ համակարգեր, ինչպես նաև շուրջ մեկ ամիս առաջ ԱՄՆ-ն Թուրքիայի «Ինջիրլիք» ռազմաբազայում տեղակայել է նոր կործանիչներ։ Դրանից զատ Մեծ Բրիտանիան հայտարարել է, որ ՆԱՏՕ-ի մի շարք այլ անդամների հետ ինքը ևս պատրաստվում է որոշակի քանակությամբ ռազմական ինքնաթիռներ տեղակայել Թուրքիայում, ինչպես նաև Գերմանիան և Դանիան պատրաստակամություն են հայտնել համագործակցել ՆԱՏՕ-ի մշտական ծովային խմբերի հետ:

ՆԱՏՕ-ի գլխավոր քարտուղարի հայտարարության և դրան հաջորդած հարզուպատասխանի տեսաձայնագրությունը ստորև:

Հիշեցնենք, որ ընդամենը մեկ ամիս առաջ՝ 2015-ի հոկտեմբերին, ԱՄՆ-ի Թուրքիայից դուրս էր բերել 2013-ից այդ երկրում տեղակայված Patriot ՀՕՊ համակարգերը։ Սրան նախորդել էր Գերմանիայի պաշտպանության նախարարության հայտարարությունը, ըստ որի՝ 2016-ի հունվարին դուրս են բերելու իրենց Patriot զենիթահրթռիային համակարգերն ու դրանց անձնակազմերը Թուրքիայից: