ՌԴ նախագահ Վլադիմիր Պուտինը հուլիսի 17-ին ստորագրել է երկրի զինված ուժերի «Հավաքագրվող պահեստազորի» ձևավորման մասին հրամանագիր։ Նոր պահեստազորային ուժերի ձևավորումը լինելու է փորձնական և հաջող ելքի դեպքում ներդրվելու է ՌԴ զինված ուժերում։ ՌԴ նախագահի հրամանագիրը հրապարակվել է երկրի իրավական տեղեկատվության պաշտոնական կայքում։
ՌԴ ԶՈւ զինծառայողներ
Նկարը՝ «ՏԱՍՍ» լրատվական գործակալության
Ծրագրով նախատեսվում է, որ պարտադիր զինծառայությունն ավարտելուց հետո զորացրվող զինծառայողները որոշակի գումարի դիմաց կարող են ստորագրել 3-ամյա պայմանագիր, որով կպարտավորվեն անցնել պարտադիր զինվորական հավաքներ։ Վերջիններս ենթադրում են առավել լուրջ վերապատրաստումներ՝ քան սովորական հավաքները։ Առաջին պայմանագրի ժամկետի ավարտից հետո պահեստազորայինները կարող են երկարաձգել պայմանագիրը 5 կամ 3 տարի, կամ ավելի քիչ ժամկետով։
Հրամանագրում նշվում է, որ ՌԴ կառավարությունը և Դաշնության սուբյեկտների գործադիր իշխանության մարմինները պետք է ապահովեն պահեստային զորքերի համար պահեստազոր զորակոչված քաղաքացիների հավաքագրման հետ կապված միջոցառումները։ Ծրագրի ֆինանսավորումը պետք է իրականացվի ՌԴ պաշտպանության նախարարության դաշնային բյուջեով նախատեսված բյուջետային հատկացումների հաշվին։
РБК լրատվակայքի տեղեկություններով՝ ծրագիրը հաստատվել էր դեռևս 2012-ին, իսկ 2013-ի հունվարի 1-ից ուժի մեջ էր մտել ՌԴ ԶՈւ պահեստազորայինների պրոֆեսիոնալ վերապատրաստման մասին օրինագիծը։ Այն պետք է ներդրվեր դեռևս 2014-ին, սակայն ֆինանսների բացակայության պատճառով հետաձգվել է։
ՌԴ պետական դումայի՝ պաշտպանական հարցերով հանձնաժողովի տվյալներով ծրագրի փորձնական ներդրման համար 2014-ին պետք է ծախսվեր 279,4 մլն ռուբլի, 2015-ին՝ 288,3 մլն, իսկ 2016-ին՝ 324,9 մլն ռուբլի։ ՌԴ ԶՈւ գլխավոր շտաբի ռազմաքաղաքական հետազոտությունների կենտրոնի ղեկավար, գեներալ-լեյտենանտ Վալերի Օստանկովը, փոխանցելով ՌԴ ՊՆ հայտնած տեղեկությունը, նշել է, որ 2014-2016թթ. նախատեսվում է կազմավորել շուրջ 5000 հոգանոց պահեստազորայինների ստորաբաժանում։