Թուրքիայի խորհրդարանի պատգամավոր, ԺՀԿ կուսակցության գլխավոր քարտուղար Գյուրսել Թեքինը հայտարարել է, որ Թուրքիան առաջիկա մի քանի օրը պատրաստվում է զինվորական գործողություն սկսել Սիրիայի տարածքում։ Այս մասին մայիսի 7-ին հայտնում է թուրքական «Թարաֆ» պարբերականի կայքը։
Թուրքական զինուժը Սիրիայի Էշմեսի գյուղում՝ «Սուլեյման շահ» գործողության ժամանակ
Թուրքիայի Ժողովրդահանրապետական կուսակցության (ԺՀԿ) գլխավոր քարտուղար Գյուրսել Թեքինը նշել է, որ երկրի նախագահ Ռեջեփ Էրդողանը և վարչապետ Ահմեթ Դավութողլու պատրաստվում են առաջիկա օրերին զորք մտցնել Սիրիայի տարածք։ Նա ավելացրել է, որ այդ լուրը ստացել է «շատ վստահելի» աղբյուրից, և եթե լուրն իրականությանը չի համապատասխանում, ապա թող Թուրքիայի վարչապետը հերքի իր ասածները։
«Թարաֆ» պարբերականին տված հարցազրույցում Գյուրսել Թեքինը նաև հայտնել է, որ Թուրքիայի և հատկապես իշխող «Արդարություն և զարգացում» կուսակցության վարկանիշը գնալով ընկնում է։ Եվ Թուրքիայի ղեկավարությունը, բոլոր այս խնդիրներից ժողովրդի ուշադրությունը շեղելու համար, ժամանակ առ ժամանակ սադրանքներ է ձեռնարկում։ Գյուրսել Թեքինն իր խոսքում մասնավորապես նշում է.
«Աղբյուրս շատ վստահելի և հուսալի է։ նույն աղբյուրս առավել վաղ հայտնել էր, որ Սուլեյման Շահի դամբարանի պատվո պահակախումբը գրեթե շրջափակման մեջ է հայտնվել և հանձնվել է «Իսլամական պետության» գթասրտությանը։ Այժմ այդ նույն աղբյուրս հայտնում է, որ Թուրքիան կարող է ռազմական գործողություն սկսել Սիրիայում։ Ես հուսով եմ, որ այդ լուրն իրականություն չի դառնա, սակայն ցանկանում եմ, որպեսզի արտգործնախարարը կամ վարչապետ Դավութօղլուն որևէ հայտարարությամբ հերքեն լուրը։ Բայց պետք է նաև նշեմ, որ «Սուլեյման Շահի» գործողության մասին մեր կողմից առավել վաղ տարածված նյութը ևս հերքվում էր, բայց ի վերջո բոլորս այդ «դիմակահանդեսի» ականատեսը եղանք»։
Նշենք, որ մինչ այժմ Գյուրսելի հայտարարության հետ կապված պաշտոնական հայտարարություն դեռևս չի եղել, միայն Թուրքիայի էկոնոմիկայի նախարար Թաներ Յըլդըզը վերջինիս խորհուրդ է տվել նախ բացահայտել աղբյուրները, ապա մեկ անգամ ևս ճշտել դրանց իսկությունը։
Հիշեցնենք, որ Թուրքիայի ԶՈւ ստորաբաժանումները 2015-ի փետրվարի լույս 22-ի գիշերը 39 տանկի ուղեկցությամբ Սիրիայի Քոբանի քաղաքի կողմից ներխուժել էին այդ երկրի տարածք, զավթել սիրիական Էշմեսի գյուղը և Հալեպից 123 կմ ու Շանլըուրֆայից 92 կմ հեռավորության վրա գտնվող Քարաքոզակ գյուղից այդտեղ տարհանել Շահ Սուլեյմանի մասունքներն ու դամբարանի պատվո պահակախմբի անձնակազը։