Վրաստանի ԶՈւ զորախումբը Կենտրոնաֆրիկյան Հանրապետությունում մասնակցել է բժշկական վարժանքի

Վրաստանի ԶՈւ 2-րդ հետևակային բրիգադի 23-րդ գումարտակը մասնակցել է Կենտրոնաֆրիկյան Հանրապետության մայրաքաղաք Բանգիում կազմակերպված միջազգային բժշկական զորավարժությանը։ Այս մասին հայտնում է Վրաստանի պաշտպանության նախարարության մամուլի ծառայությունը։

Վրաստանի ԶՈւ զինծառայողները Կենտրոնաֆրիկյան Հանրապետությունում մասնակցել են բժշկական վարժանքների

Վարժանքների նպատակն է եղել արտակարգ իրավիճակների պայմաններում փորձարկել բժշկական ստորաբաժանումների փոխգործակցությունը և արագ արձագանքելու կարողությունը։

Հաղորդագրության մեջ նշվում է նաև, որ վրաստանյան բժշկական անձնակազմի հետ վարժանքներին մասնակցել են նաև ռազմական բժիշկներ և սանիտարներ Ֆրանսիայից և Սերբիայից։ Վարժանքի սցենարով ճաշարանի մոտ ձեռքի նռնակի պայթյունի հետևանքով 6 զոհ է եղել։ Սցենարով բուժանձնակազմի աշխատանքը ղեկավարությունը դրական է գնահատել։

23-րդ գումարտակը Վրաստանի ԶՈւ երկրորդ զորախումբն է, որ խաղաղապահ առաքելություն է իրականացնում Կենտրոնաֆրիկյան Հանրապետությունում։

Վրաստանի ԶՈւ զինծառայողները Կենտրոնաֆրիկյան Հանրապետությունում մասնակցել են բժշկական վարժանքների

Այս զինծառայողները 2014թ. դեկտեմբերին փոխարինել են Բաթումի՝ Եվրամիության հովանու ներքո Կենտրոնաֆրիկյան Հանարապետությունում 6 ամիս ծառայած առանձին հետևակային գումարտակին։ Նախապես պատրաստություն անցած այս զորախումբն առաջիկա 4 ամիսների ընթացքում առաքելություն է իրականացնելու Բանգիում՝ պարեկություն անելով օդանավակայանի մերձակայքում։

Տեղեկացնենք, որ ԵՄ-ն կարողանում է այդ երկրում խաղաղապահ առաքելություն իրականացնել ՄԱԿ-ի թույլտվությամբ։ Առաքելությունը մեկնարկել է 2014թ. փետրվարից։

Դեռևս 2013 թվականի նոյեմբերի 29-ին Վիլնյուսում Արևելյան գործընկերության գագաթաժողովում ստորագրվել է համաձայնագիր Եվրամիության և Վրաստանի միջև, ըստ որի՝ վրացական կողմը կարող է մասնակցել ԵՄ կողմից ճգնաժամային իրավիճակներում գործողությունների իրականացմանը։ Այդ պահից էլ Վրաստանը ԵՄ-ից ստացել է խաղաղապահ առաքելություն իրականացնելու հրավեր, այդ թվում նաև՝ աֆրիկյան երկրների համար։

Վրաստանն առաջարկը քննել է 2014թ. փետրվարի 20-ին կայացած կառավարության նիստում։ Հենց այս ժամանակ էլ կառավարությունը համաձայնել է վրացական կողմի ներգրավմանը։

Հավելենք, որ 2014թ. հոկտեմբերին այն ժամանակվա պաշտպանության նախարար Իրակլի Ալասանիան հայտարարել էր, որ վրաստանյան 150 հոգանոց զորախումբը դեկտեմբերին դուրս է գալու աֆրիկյան այդ երկրից՝ էբոլա վիրուսով չվարակվելու համար։ Սակայն, ինչպես երևում է, Վրաստանը շարունակել է մասնակցել առաքելությանը։

ԿԱՀ-ում իրավիճակը լարվել է 2013թ. դեկտեմբերից, երբ Բանգի մայրաքաղաքում բախումներ են եղել իսլամիստ զինյալների և քրիստոնյա ապստամբների միջև։ ՄԱԿ-ի տվյալներով՝ հակամարտության ընթացքում մոտ մեկ միլիոն մարդ փախստական է դարձել, հազարավորներն էլ զոհվել են։ Նախագահ Միշել Ջոտոդիան 2014-ի հունվարի 10-ին հրաժարական է տվել՝ հայտարարելով, որ ի զորու չէ հանգուցալուծել երկրում ստեղծված իրավիճակը։

Այժմ Կենտրոնաֆրիկյան Հանրապետությունում խաղաղապահ առաքելություն են իրականացնում Աֆրիկյան միությունը, Ֆրանսիան ու Եվրամիությունը։