Պարո´ն նախարար, Ձեր առաջադրանքը կատարված է. զեկուցում է տանկային հավաքականի հրամանատարը

«Պարո´ն նախարար, ՀՀ ԶՈւ տանկային բիաթլոնի աշխարհի առաջնությանը մասնակից անձնակազմն իր առջև դրված խնդիրը կատարեց և վերադարձավ հայրենիք, խմբի հրամանատար, գնդապետ Պողոսյան»։

Զեկուցում է գնդապետ Պողոսյանը

Տանկային զորամասի հրամանատար, գնդապետ Ժիրայր Պողոսյանը հենց այսպես է զեկուցում ՀՀ պաշտպանության նախարարին Ռուսաստանում անցկացված տանկային բիաթլոնում մեր հավաքականի՝ 2-րդ տեղը գրավելու մասին: Այնուհետև նախարար Օհանյանը շնորհավորում ու շնորհակալություն է հայտնում տանկիստներին և ընդունում վաստակած Տ-90Ս տանկի վկայագիրը:

Տ-90Ս տանկի վկայագիրն ընդունելիս

Տանկային բիաթլոն-2014 մրցույթին Հայաստանը ներկայացրած ու 12 երկրների շարքում 2-րդ տեղը գրաված տանկիստներն այսօր՝ օգոստոսի 17-ին, վերադարձան Երևան: «Զվարթնոց» օդանավակայանում նրանց դիմավորելու էին եկել պաշտպանության նախարար Սեյրան Օհանյանը, նախարարի առաջին տեղակալ Դավիթ Տոնոյանը, ԶՈւ գլխավոր շտաբի պետ, գեներալ-գնդապետ Յուրի Խաչատուրովը, ԶՈւ ԳՇ վարչությունների պետեր, բարձրաստիճան այլ զինվորականներ, ժամկետային զինծառայողներ, տանկիստների հարազատներն ու մարդկանց հոծ բազմություն։

Տանկիստների ժամանմանը սպասելիս

Օդանավակայանում ամենաքննարկվող դրվագներից մեկի հերոսը տանկային երրոդ անձնակազմի մեխանիկ-վարորդ, շարքային Նարեկ Շառոյանն էր, ով եզրափակիչ փուլի էստաֆետային մրցավազքի վերջում տանկով դեպի վերջնագիծ սլանալու ընթացքում՝ հասկանալով արդեն, որ Չինաստանի և Ղազախստանի տանկերը թողել է հետևում ու հավաքականին պարգևում է պատվաբեր երկրորդ տեղը, հենց տանկի մեջ ոգևորությունից սկսել է երգել։

Ռազմինֆոյի հետ զրույցում Հայաստանը ներկայացնող առաջին տանկային անձնակազմի մեխանիկ-վարորդ, շարքային Գագիկ Գևորգյանը նշեց, որ տանկային բիաթլոնում բոլոր մրցաձևերն էլ դժվար էին, սակայն հայկական անձնակազմերը լավ էին պատրաստված, ինչի շնորհիվ էլ կարողացան հաջողությամբ հանդես գալ ու կատարել առաջնությունից առաջ տված խոստումը:

Փոխչեմպիոնության հավաստագիրը

Տանկիստներից երրորդ անձնակազմի նշանառու օպերատոր, շարքային Սանասար Ծառուկյանն էլ նշեց, որ Հայաստանը հիմնականում ներկայացնում էին ժամկետային զինծառայողներ, իսկ մյուս երկրների թիմերում կային պայմանագրային փորձառու տանկիստներ: Ու չնայած մրցակիցների մեծ փորձին ու գիտելիքներին, հայաստանցի տանկիստները կարողացան 2-րդ տեղը գրավել, քանի որ տանկերի հնարավորություններն օգտագործում էին մինչև վերջ: Շարքային Ծառուկյանի խոսքով՝ իրենք մրցում էին սիրով, ինչը ևս շատ կարևոր էր հաղթանակի ճանապարհին:

Նշենք, որ հանդիսավոր արարողությունից հետո բոլոր տանկիստները հարազատների ուղեկցությամբ մեկնեցին վաստակած տասնօրյա արձակուրդ:

Հիշեցնենք նաև, որ Տանկային բիաթլոն-2014 մրցույթում Հայաստանի հավաքականը գրավեց 2-րդ տեղը, ինչի համար էլ կազմակերպիչներից նվեր ստացավ Տ-90Ս տանկ: Ցուցադրած արդյունքով Հայաստանի տանկիստները զիջեցին միայն Ռուսաստանին: Առաջնության 3-րդ ու 4-րդ տեղերը գրավեցին համապատասխանաբար Չինաստանի և Ղազախստանի հավաքականները։

Կարդացեք նաև՝ Տանկային բիաթլոնում վաստակած Տ-90Ս տանկը Հայաստանում կարող է օգտագործվել որպես ուսումնանյութական բազա