Լատինական Ամերիկայի ու Հարավարևելյան Ասիայի որոշ երկրներ հետաքրքրություն են ցուցաբերում Ռուսաստանի ու Հնդկաստանի համատեղ արտադրած BrahMos գերձայնային հրթիռների նկատմամբ: Այս մասին, ըստ Army Recognition կայքի, հայտնել է հրթիռներն արտադրող BrahMos Aerospace ընկերության տնօրեն Սուդիր Կումար Միշրան (Sudhir Kumar Mishra):
Հնդկաստանի ու Ռուսաստանի համատեղ նախագծման BrahMos գերձայնային հրթիռը
Ընկերության տնօրենը նշել է, որ Հնդկաստանն ու Ռուսաստանը պատրաստ են արտահանել հրթիռները, եթե պաշտոնական առաջարկներ լինեն, սակայն չի հստակեցրել, թե որ երկրներն են հրթիռները գնելու մտադրություն հայտնել: Կայքի ունեցած աղբյուրը, սակայն, տեղեկացրել է, որ այդ երկրներն են Վիետնամը, Ինդոնեզիան ու Վենեսուելան:
Ավելացնենք, որ Ռուսաստանի ու Հնդկաստանի նախագծած BrahMos հրթիռները հիմնականում նախատեսված են եղել նախագծող երկու երկրների զինված ուժերի մատակարարման համար, սակայն ի սկզբանե չի բացառվել նաև դրանց արտահանումը: Հրթիռների նախագծումը կատարել են 1998-ից սկսած, իսկ առաջին անգամ ներկայացրել են 2006-ին։
Ներկայում այս հրթիռներից մի քանի հարյուր միավոր առկա է Հնդկաստանի զինված ուժերի սպառազինության մեջ։ Ստեղծվել են հրթիռի մի շարք արդիականացումներ մակերևույթից, օդից ու սուզանավերից արձակման համար։ Կատարվել է հրթիռի ավելի քան 40 փորձարկում:
Հրթիռի զանգվածը 3 տոննա է (օդից արձակվող տարբերակը՝ 2,5 տոննա), իսկ մարտական մասի զանգվածը՝ 250-300 կգ, հրթիռը կարող է տեղափոխել նաև միջուկային մարտագլխիկ։ Հրթիռի թռիչքի առավելագույն բարձրությունը 15 կմ է, առավելագույն հեռավորությունը՝ 300 կմ։ Հրթիռը թռչում է ձայնի արագությունը 2 անգամ, իսկ մեծ բարձրությունների դեպքում՝ մինչև 2,8 անգամ գերազանցող արագությամբ։