Ադրբեջանի ՊՆ-ն թաքցրել էր հուլիսի 31-ի գիշերվա իր կորուստները

Օգոստոսի 4-ին Ադրբեջանի պաշտպանության նախարարության պաշտոնական կայքը տեղեկացրեց՝ «հայկական հարձակման հետևանքով» վիրավորված զինծառայող Գարազադե Անար Վիվադի օղլուն մահացել է հոսպիտալում։ Իրենց հերթին ադրբեջանական լրատվամիջոցները հաղորդեցին՝ զինծառայողը վիրավորվել էր «հուլիսի 31-ի լույս օգոստոսի 1-ի գիշերը Հորադիզում հայերի հարձակվելու պատճառով»։

Հետաքրքիր է այն հանգամանքը, որ մինչ այդ Ադրբեջանի ՊՆ հաղորդագրություններում վիրավորների շարքում այս զինծառայողի անունը բացակայում էր։ Ադրբեջանական լրատվամիջոցներում ևս խոսք չի եղել նրա վիրավորվելու մասին։ Սա մեզ թույլ է տալիս եզրակացնել, որ ադրբեջանական կողմը թաքցրել է հուլիսի 31-ին զինծառայողի վիրավորման դեպքը։

Բացի այդ, ադրբեջանական աղբյուրները հավաստիացնում են, թե հուլիսի 31-ից մինչ օրս առաջնագծում ունեցել են 13 կորուստ, սակայն նույն ադրբեջանական մամուլը հրապարակել է առնվազն 14-ի անունը։

• Պայմանագրային, Ահմեդով Գարյաղդի Էլդար օղլու, ծնված 1992 թ, զորակոչված Աղդամի շրջանից։
• Ալմազով Իսա Զիյադ օղլու, ծնված 1977 թ, զորակոչված Ղազախի շրջանից,
• Պայմանագրային, շարքային Էլվին Ասկերով, զորակոչված Շիրվան քաղաքից (վիրավոր),
• Ալի Ռահիմով, զորակոչված Մասալինի շրջանից,
• Մուսթաֆա Ալիջոքսունով, զորակոչված Խաչմազի շրջանից,
• Սաֆթար Մամեդով, զորակոչված Սալյանի շրջանից,
•  Աբդինով Հուսեին Էթիբար օղլու, զորակոչված Սումգայիթի շրջանից,
• Էլնուր Իբրահիմով, զորակոչված Ղուբայի շրջանից,
• Վյուգար Փոլադով, զորակոչված Թովուզի շրջանից,
• ենթասպա Ալիև Փերվին Սալահադդին օղլու
• կրտսեր ենթասպա Հուսեյնով Ռահիլ Սաֆար օղլու
• կրտսեր ենթասպա Ահմադով Էլչին Ռասիմ օղլու
• պայմանագրային զինծառայող, շարքային Գուլիև Սարխան Գայրեթ օղլու
• Գարազադե Անար Վիվադի օղլու

Այսպիսով, թե´ ադրբեջանական մամուլը, թե´ Ադրբեջանի պաշտպանական գերատեսչությունը նվազեցնում են սեփական մարտական կորուստները, բացի այդ հրապարակում վիրավոր զինծառայողի միջադեպն ու վերջինիս անձնական տվյալները միայն զինծառայողի մահվանից հետո։

Սա եզակի դեպք չէ. ավելի վաղ` 2013-ի հոկտեմբերին Ադրբեջանի ԶՈւ զինծառայողի՝ ավտովթարի հետևանքով վիրավորվելու մասին հայտնի էր դարձել միայն վերջինիս մահվանից հետո։

Հիշեցնենք, որ հուլիսի 31-ից մինչ օրս առաջնագծում լարված վիճակ է։ Ադրբեջանական կողմը պարբերաբար խախտում է հրադադարի ռեժիմը, ձեռնարկում հետախուզադիվերսիոն հարձակման փորձեր, առաջնագծի տարբեր հատվածներում գրանցվել է փոխհրաձգություն։ ՊԲ պաշտոնական տվյալներով՝ նշված ժամանակահատվածում հայկական կողմն ունեցել է 5 զոհ, 7 վիրավոր։