Ադրբեջանի պաշտպանության նախկին փոխնախարարն Ադրբեջանի կորուստների համար մեղադրում է Զաքիր Հասանովին

Ադրբեջանի պաշտպանության նախկին փոխնախարար, գնդապետ Իսա Սադիգովը վերջին շրջանում առաջնագծում լարվածության և Ադրբեջանի ԶՈւ մարտական կորուստների համար մեղադրել է ներկայիս նախարար Զաքիր Հասանովին և Ադրբեջանի իշխանություններին։ 

Ադրբեջանի պաշտպանության նախկին փոխնախարար Իսա Սադիգով

Ադրբեջանի պաշտպանության նախկին փոխնախարար Իսա Սադիգով

Ադրբեջանական Axar.az կայքի փոխանցմամբ՝ Իսա Սադիգովը շեշտել է, որ մեկ օրում առաջնագծում «11 զոհն իսկական աղետ է» ՝ դժգոհություն հայտնելով Ադրբեջանի ՊՆ որդեգրած պաշտպանության սկզբունքներից։

Սադիգովը նաև ընդգծել է, որ առաջնագծի դեպքն անմիջական առնչություն ունի Ադրբեջանի զինված ուժերում առկա լուրջ խնդիրների, ինչպես և 2013-ի հոկտեմբերից պաշտպանության նախարար պաշտոնավարող Զաքիր Հասանովի նվազ ազդեցությունը ԶՈւ և ՊՆ համակարգերում։ Նախկին փոխնախարարի հավաստիացմամբ՝ կատարվածն Ադրբեջանի համար խայտառակություն է, և առաջին հերթին պատասխանատվություն է կրում գնդի հրամանատարը պաշտպանության նախարարի առջև, իսկ պաշտպանության նախարարը՝ գերագույն հրամանատարի, այսինքն՝ երկրի ղեկավարի առջև։

Հիշեցնենք, որ Սադիգովը 1993-ին Ադրբեջանում Սուրեթ Հուսեյնովի իրականացրած հեղաշրջման փորձի մասնակից է, որպես պաշտպանության փոխնախարար պաշտոնավարել է 1993-1996-ին, հայտնի է Ադրբեջանի ներկայիս իշխանությունների դեմ ուղղված սուր քննադատություններով,բազմիցս իր համակրանքն է հայտնել Ադրբեջանի ընդդիմադիր խմբակցություններին։

Հավելենք, որ հուլիսի 31-ից մինչ օրս առաջնագծում լարված իրավիճակ է։ Ադրբեջանական կողմը խախտում է հրադադարի ռեժիմը, հետախուզադիվերսիոն հարձակման փորձեր արել։ Հայկական կողմն արժանի պատասխան է տվել հակառակորդին։ Նույն ժամանակահատվածում հայկական զինուժն ունեցել է 5 զոհ, 7 վիրավոր, ադրբեջանականը՝ առնվազն 15 զոհ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *