Չնայած Ռուսաստանի նկատմամբ հայտարարված պատժամիջոցներին՝ գերմանական Rheinmetall AG ընկերությունը կավարտի միջտեսակային ռազմական ուսումնական կենտրոնի կառուցումը Մուլինո քաղաքում (Նիժնի Նովգորոդ քաղաքի մոտակայքում):
Նոր բազմանպատակային զորավարժարանը կծառայի ՌԴ զինված ուժերի արևմտյան ռազմական օկրուգի տարբեր զորատեսակների նպատակներին, ինչի մասին, ըստ ռուսաստանյան «ՌԻԱ Նովոստի» գործակալության, հայտնել է ՌԴ պաշտպանության փոխնախարար Յուրի Բորիսովը:
Մուլինոյում ներկայում կա հրետանու համար նախատեսված զորավարժարան
Պաշտոնյայի խոսքով՝ ՌԴ զինված ուժերի արևմտյան ռազմական օկրուգում նման կառույցի ստեղծումից հետո Ռուսաստանը սեփական ուժերով կկարողանա նման կառույցներ ստեղծել նաև մյուս ռազմական օկրուգների կարիքների համար:
Բորիսովը հայտնել է, որ կառույցի շինարարությունը կավարտվի մինիչև 2014-ի դեկկտեմբեր: Այն կռանա ամբողջ օկրուգի համար նախատեսված տեխնոլոգիաներով զարգացած կենտրոն: Զորավարժարանում միաժամանակ կկարողանան պարապմունք անցկացնել մեկ բրիգադի չափ զինծառայողներ, այնտեղ հնարավոր կլինի անցկացնել ցանկացած տեսակի մարտավարական վարժանք:
Նշենք, որ ուսումնական կենտրոնի կառուցման մասին ռուսաստանյան ու գերմանական կողմերը պայմանավորվել էին դեռևս 2011-ի հոկտեմբերին: Նախատեսված էր, որ կենտրոնը պատրաստ պիտի լիներ արդեն 2014-ի կեսերին:
Pingback: Գերմանիան կարող է չշարունակել Ռուսաստանի համար զորավարժարանի կառուցումը | Ռազմ.info