Թուրքական ընկերությունը պայմանագրեր է կնքել Airbus-ի և Rolls Royce-ի հետ

Թուրքական Aselsan («Ասելսան») ընկերությունը Բեռլինում կայացած ILA-2014 ավիացուցահանդեսի ընթացքում պայմանագրեր է կնքել եվրոպական Airbus կոնցերնի և բրիտանական Rolls Royce ընկերության հետ։

Aslesan-ն ու Rolls Royce-ը՝ պայմանագիրը կնքելիս

Թուրքիայի խոշորագույն ռազմարդյունաբերական ընկերությունը նոր պայմանագրով նախատեսում է խորացնել համագործակցությունն Airbus-ի (Էյրբաս) հետ քաղաքացիական և ռազմական ավիացիայի համար ավիոնիկ համակարգերի, արբանյակային կապի, ռադիոկապի, էլեկտրաօպտիկական և լազերային համակարգերի արտադրության ոլորտներում։

Rolls Royce (Ռոլս Ռոյսի) հետ պայմանագրով նախատեսվում է համագործակցություն շարժիչների վերահսկման համակարգերի արտադրությունում։

«Ասելսանում» նշել են, որ այս պայմանագրերով իրենք նախատեսում են ավելի մեծ ներկայություն ունենալ արտաքին շուկայում, տեղեկացնում է DefenseNews ռազմական լրատվակայքը։

Թուրքիան այս տարի ILA-2014 ավիացուցահանդեսին մասնակցում էր «գործընկեր երկրի» կարգավիճակով։ Մայիսի 20-25-ն անցկացված ավիացուցահանդեսին մասնակցում էր թուրքական ռազմական և քաղաքացիական ավիացիան ներկայացնող թուրքական 17 ընկերություն, այդ թվում՝ «Ասելսանը»։

Թուրքական «Ասելսանը» պետական ձեռնարկությունը ստեղծվել է 1975 թվականին։ Այն մասնագիտացած է ռազմական նշանակության էլեկտրոնային սարքավորումների արտադրությունում։