Մայիսի 19-ին կայացել է Նախիջևանի Ինքնավար Հանրապետության տարածքում տեղակայված, այսպես կոչված «առանձին համազորային բանակի» ստորաբաժանումներին նոր մարտական դրոշի տրամադրման հանդիսավոր արարողությունը։
Նախիջևանի «առանձին համազորային բանակը» նոր մարտական դրոշ ունի
Այս մասին հաղորդում է Ադրբեջանի պաշտպանության նախարարության պաշտոնական կայքը։
Արարողությանը ներկա էին Նախիջևանի «առանձին համազորային բանակի» հրամանատար, գեներալ-լեյտենանտ Քերեմ Մուսթաֆաևը, Նախիջևանի Ինքնավար Հանրապետության Գերագույն մեջլիսի քարտուղար Վասիֆ Թալիբովը, Ադրբեջանի պաշտպանության նախարար, գեներալ-գնդապետ Զաքիր Հասանովն ու Ադրբեջանի ԶՈւ բարձրաստիճան զինվորականներ։
Նախիջևանի «առանձին համազորային բանակը» նոր մարտական դրոշ ունի
Արարողությունն ավարտվել է «առանձին համազորային բանակի» ստորաբաժանումների՝ մարտական դրոշով կատարված հատուկ քայլքով։
Հիշեցնենք, որ 2013-ի դեկտեմբերի 20-ին հայտնի է դարձել՝ Ադրբեջանի՝ Նախիջևանի 5-րդ բանակային կորպուսի հիման վրա ստեղծվել է «առանձին համազորային բանակ», որի գործառույթներն ու կառույցվածն անհայտ են։
Ադրբեջանի պաշտպանության նախարարության մամուլի ծառայության փոխանցմամբ՝ այսպես կոչված «առանձին համազորային բանակը» ծառայելու է Նախիջևանի Ինքնավար Հանրապետության պաշտպանական համակարգի արդյունավետության բարձրացման, մեկ ընդհանուր կենտրոնից կառավարման նպատակներին։
Քերեմ Մուսթաֆաևը ռազմական ոլորտում գործունեություն է ծավալել դեռևս Հեյդար Ալիևի իշխանության տարիներից։ Նա ողջ պաշտոնավարման ընթացքում վայելում է թուրք բարձաստիճան զինվորականների աջակցությունը։ Նրա անվան հետ կոռուպցիայի ու զինծառայողների ներքին օրգանների վաճառքի թեմաներով մի շարք սկանդալ են կապված։
Այսպես, հունիսի 26-ին հայտնի է դարձել, որ Քերեմ Մուսթաֆաևն իրեն ենթակա մի խումբ սպաների և ենթասպաների առանց որևէ բացատրության զրկել է պարգևավճարից, ինչը հանգեցրել է բողոքի ալիքի բարձրացմանը։