Ադրբեջանական լրատվակայքերի փոխանցմամբ՝ Նախիջևանի Ինքնավար Հանրապետության տարածքում տեղակայված զինվորական հոսպիտալներից մեկում բուժում անցած զինծառայողներից մեկը հրապարակել է 2014-ի մարտի 21-ին արված լուսանկար, որտեղից հետևում է՝ առողջական խնդիրներ ունեցող զինծառայողներին հարկադրում են մաքրություն անել հոսպիտալում։
Նախիջևանի հոսպիտալներից մեկի մուտքի լուսանկարը, որտեղ զինծառայողների ձեռքներին ավելներ են
Նախիջևանի հոսպիտալներից մեկի մուտքի լուսանկարը, որտեղ զինծառայողների ձեռքներին ավելներ են
Ինչպես հաղորդում է ադրբեջանական Azadlıq թերթի կայքը, լուսանկարում պատկերված հոսպիտալում բուժում են անցնում հիմնականում ծանր հիվանդություն ունեցող զինծառայողները։
Լուսանկարում երևում են թվով 3 զինծառայող, որոնց ձեռքներին ավելներ են, մինչդեռ մաքրման աշխատանքները հոսպիտալում պետք է կատարեն դրա դիմաց գումար ստացող աշխատակիցները՝ հավաքարարները։
Azadlıq թերթը պարզաբանում ստանալու նպատակով դիմել է Նախիջևանի հատուկ համազորային բանակի մամուլի ծառայությանը։ Թերթին մեկնաբանել են, որ տեղյակ չեն միջադեպից, կփորձեն պարզել իրողությունն ու պատժել մեղավորներին։
Հիշեցնենք, որ 2013-ի սեպտեմբերի կեսերին Ադրբեջանում զինծառայողների՝ փողոցներն ավլելու վերաբերյալ սկանդալ էր արձանագրվել։ Նախընտրական արշավի շրջանակներում սեպտեմբերի 18-ին Իլհամ և Մեհրիբան Ալիևների այցի նախօրեին Ղուբայի տեղական ինքնակառավարման մարմինների հրահանգով այստեղ տեղակայված ներքին զորքերի զորամասի զինծառայողներին հանել էին զորամասից, ապա հարկադրել նրանց վերցնել ավելներն ու մաքրել քաղաքի փողոցները։