Թուրքիան Պակիստանին առաջարկել է թուրք-իտալական արտադրության T129 հարվածային ուղղաթիռները։ Սակայն թուրքական կողմին ծանր մրցակություն է սպասվում, քանի որ պակիստանյան հարվածային ուղղաթիռների պարկը թարմացնելու համար պայքարում են նաև ամերիկացիները։
Պակիստանը ցանկանում է թարմացնել ռազմաօդային ուժերի ուղղաթիռների պարկը, քանի որ ներկայում հիմնական հարվածային ուժը կազմող AH-1 F Modernized Cobra-ն այդ երկրում համարում են հնացած։
Ինչպես հայտնում է Defense News ռազմական կայքը, պակիստանցիներին նոր ուղղաթիռներ մատակարարելու գլխավոր հավակնորդը Միացյալ Նահանգներն է, որն առաջարկում է AH-1Z Viper հարվածային ուղղաթիռները։
Ամերիկյան կողմի հնարավորությունները մեծ են նրանով, որ Վաշինգթոնն Իսլամաբադին ռազմական ոլորտի համար ֆինանսական օգնություն է տրամադրում (այս տարի՝ շուրջ 300 մլն ԱՄՆ դոլար), որն էլ կարող է ուղղվել նոր ուղղաթիռներ ձեռք բերելուն։
Բացի այդ, ամերիկյան կողմի առաջարկած ուղղաթիռները նման են արդեն պակիստանյան օդուժում առկա օրինակներին, ուստի օդաչուների ուսուցումը կլինի ավելի արագ և մատչելի:
Թուրքիան առաջարկում է T129 հարվածային ուղղաթիռները, որոնք դեռ սերիական արտադրության չեն դրվել և անցնում են թռիչքային փորձարկումների շրջանը։ Թուրքական կողմի համար խնդիր կարող է դառնալ նաև T129-ի ամերիկյան LHTEC CTS800-4N շարժիչները. դրանց պատճառով Թուրքիան ԱՄՆ-ից պետք է թույլտվություն ստանա ուղղաթիռների արտահանման համար։
Թուրքիան արդեն կատարել է առաջին քայլը սեփական արտադրութւյան ուղղաթիռները Պակիստանին առաջարկելու ուղղությամբ։ Մասնավորապես, 2013 թվականի սեպտեմբերի կեսերին Պակիստանի վարչապետ Նավազ Շարիֆի այցի ժամանակ Թուրքիան առաջարկել է պակիստանցիներին անվճար տրամադրել 3 միավոր T129 ուղղաթիռ և դրանց պահեստամասեր։
Բացի այդ, Թուրքիան պատրաստ է Պակիստանի տարածքում հիմնել T129 ուղղաթիռների համատեղ արդադրություն, ինչպես արվել է 2009 թվականին MKEK Panther հաուբիցների վաճառքի ժամանակ, որոնք ներկայում արդեն արտադրվում են Պակիստանում։
Այնուամենայնիվ, դեռ հայտնի չէ, թե Պակիստանն ում է տալիս նախապատվությունը։ Հայնտի չեն նաև վերջնական որոշման ժամկետները ու հնարավոր պայմանագրի արժեքը։
Նշենք, որ T129 Atak ուղղաթիռները ստեղծվել են իտալական Agusta A129 Mangusta ուղղաթիռների հիմքի վրա։ Ուղղաթիռի թուրքական տարբերակը ստեղծվել է «Թուրքիայի տիեզերական արտադրություն» (TAI) ընկերության կողմից՝ իտալական ընկերության հետ համագործակցության արդյունքում։
Ուղղաթիռներն ունեն ամերիկյան արտադրության LHTEC CTS800-4N շարժիչներ։ Ներկայում T129-երն անցնում են փորձարկումների փուլ։ Ստեղծվել է T129A և T129B նախատիպերը։ Երկրորդ տարբերակը հարվածային ուղղաթիռի նախատիպն է։
Առաջին թռիչքը կատարել է 2009 թվականի սեպտեմբերին։ Առավելագույն արագությունը 269 կմ/ժ է, կարող է անցնել 561 կմ, բարձրացնել մինչև 1,2 տոննա զինամթերք։
Pingback: Թուրքական առաջին հարվածային ուղղաթիռի ընդունումն ուշանում է. թերություններ կան | Թուրքագիտական պորտալ