Ավստրիայի զինված ուժերը ստացել է արդիականացված Lockheed Martin C-130K Hercules բեռնատար ինքնաթիռի առաջին օրինակը։
Ինքնաթիռն ավստրիական կողմին են հանձնել Մեծ Բրիտանիայի Քեմբրիջի տարածքում տեղակայված ռազմաբազայում, տեղեկացնում է «Ջեյնսը»։
C-130K
Ավստրիական օդուժի C-130K ինքնաթիռների արդիականացման աշխատանքներով զբաղվում է բրիտանական Marshall Aerospace and Defence ընկերությունը։ Պայմանագիրը կնքվել է 2012 թվականի օգոստոսին։
Ընդհանուր առմամբ, նախատեսվում է արդիականացնել երեք միավոր C-130K, որոնցից առաջինն էլ արդեն հանձնվել է ավստրիացիներին։
Marshall Aerospace and Defence ընկերությունը փոխել է ինքնաթիռի սարքավորումների մի մասն ավելի ժամանակակից տեխնիկայով։
Նշենք, որ C-130 ինքնաթիռների արտադրությամբ է զբաղվում ամերիկյան Lockheed Martin ընկերությունը։ Այս տիպի ինքնաթիռներն առաջին թռիչքը կատարել են 1954 թվականին։
Մեկ միավորի մոտավոր արժեքն է 62 մլն ամերիկյան դոլար։ Առավելագույն արագությունը շուրջ 590 կմ/ժ է, առանց լիցքավորման կարող է թռչել 3800 կմ։ Կարող է տանել մինչև 20 տոննա բեռ կամ մինչև 92 ուղևոր։