Հնդկաստանի և Պակիստանի սահմանին բախման ժամանակ 5 հնդիկ զինծառայող է զոհվել։
Հնդկաստանի արտաքին գործերի նախարարության հայտարարության համաձայն՝ այսօր` օգոստոսի 5-ի վաղ առավոտյան պակիստանյան բանակը դարան է կազմել և սպանել հնդկական զինված ուժերի 5 զինծառայողի։ Դեպքը եղել է Քաշմիր շրջանի Պունչ կոչվող հատվածում։
Ընթացիկ տարվա սկզբից Հնդկաստանի և Պակիստանի զինված ուժերի շփման գծում արդեն 30-ից ավել պատահար է գրանցվել։
Հնդկաստանն ու Պակիստանը տարածքային վեճեր ունեն, որոնք շարունակվում են շուրջ 60 տարի, իսկ հակամարտությունը ոչ միայն հանգուցալուծում չի ստանում, այլ մշտապես լարված դրություն է ստեղծում շփման գծում։
Քաշմիր շրջանի խնդիրն ի հայտ է եկել 1947 թվականին Բրիտանական Հնդկաստանի բաժանումից հետո։ Այն պատճառ է դարձել 1947-48, 1965 և 1971 թվականների հնդիկների և պակիստանցիների միջև պատերազմների, ինչպես նաև բազում սահմանային միջադեպերի։