Ամերիկյան պատժամիջոցների ակնհայտ ազդեցություն առայժմ չենք տեսնում․ Թուրքիայի ՊԱԳՎ

Թուրքիայի Պաշտպանական արդյունաբերության գլխավոր վարչության (ՊԱԳՎ) նկատմամբ 2020թ. դեկտեմբերին սահմանված ամերիկյան պատժամիջոցների ակնհայտ ազդեցությունն առայժմ չենք տեսնում, սակայն դրանք որոշ նախագծերում հետագայում կարող են ի հայտ գալ։

Այս մասին թուրքական NTV հեռուստաընկերության ուղիղ եթերում հայտարարել է ՊԱԳՎ պետ Իսմայիլ Դեմիրը՝ հաստատելով, որ Թուրքիա֊ԱՄՆ միջև հակասությունների հետևանքով տուժած F-35 կործանիչների ծրագրի համար թուրքական կողմն իսկապես դիմել է ամերիկյան իրավաբանական ընկերությանը։

Ամերիկյան Foreign Lobby լրատվակայքի տվյալներով՝ ՊԱԳՎ-ն 6 ամսով վարձել է ամերիկյան Arnold & Porter իրավաբանական ընկերությանը՝ F-35 կործանիչների արտադրության ծրագիր վերադառնալու համար օգնություն ու խորհրդատվություն ստանալու նպատակով։ Ըստ աբյուրի՝ իրավաբանական ընկերությունը, բացի թուրքական կողմին խորհրդատվություն մատուցելուց, նաև փորձելու է կապեր հաստատել կործանիչների ծրագրի անդամ մյուս ընկերությունների հետ ու հասկանալ դրանց վերաբերմունքը ծրագրին թուրքական ՊԱԳՎ֊ի մշտական ներգրավվածության նկատմամբ։

Ըստ Դեմիրի՝ թուրքական կողմը նախ տեղական իրավաբանական ընկերությունների հետ է աշխատել, այնուհետ ամերիկյան որոշ իրավաբանական և լոբբիստական ընկերությունների հետ քննարկումներ արել ու ընտրություն կատարել։

Թուրքիայի ՊԱԳՎ պետը հարցազրույցի ընթացքում մի քանի նորություն է հայտնել նաև երկրի ռազմարդյունաբերությունից։ Այսպես՝

  • Ս-400-ների երկրորդ խմբաքանակի ձեռքբերման շուրջ աշխատանքները շարունակվում են;
  • Թուրքական «Ալթայ» (Altay) տանկի արտադրության համար աշխատանքներ են տարվում տեղական արտադրության շարժիչի շուրջ։ Ամենակարճ ժամկետում ուզում են լուծել շարժիչի հետ կապված խնդիրները;
  • «Հիսար֊Ա» (Hisar-A) և «Սունգուր» (Sungur) թուրքական ՀՕՊ միջոցներն այս տարի կսկսեն մատակարարվել զինված ուժերին;
  • Տեղական արտադրության TF-X կործանիչի արտադրման ծրագրում ուշացումներ չեն սպասվում (կործանիչը նախատեսում է փոխարինել Թուրքիայի սպառազինությունում առկա F-16 ամերիկյան կործանիչներին։ Առաջին թռիչքը պլանավորվում է 2025թ. ― Ռազմինֆո);
  • Նախատեսվում է L-400 Anadolu թուրքական առաջին դեսանտային նավի վրա հարվածային ԱԹՍ տեղադրել։ Դրա համար զարգացնում են Bayraktar TB2 հարվածային ԱԹՍ-ները։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *