«Թուրքական ավիաշինական արդյունաբերություն» ընկերությունը (TAI, թրք․՝ TUSAŞ) Թուրքիայի ռազմածովային ուժերին է փոխանցել 2 միավոր «ԱՆՔԱ» (ANKA) անօդաչու թռչող սարք (ԱԹՍ)։ Այդ անօդաչուները կիրառվելու են միջերկրածովյան շրջանների պաշտպանության գործում։
Այս մասին հայտնել է Թուրքիայի պաշտպանական արդյունաբերության գլխավոր վարչությունը (ՊԱԳՎ)։ Հայտարարությունից պարզ չէ, թե խոսքը «Անքա» ԱԹՍ-ի որ տարբերակի մասին է՝ հարվածային և հետախուզական, թե՝ միայն հետախուզական:
Մինչ այս Թուրքիայի ՌԾՈւ հրամանատարության սպառազինությունում առկա էր 4 միավոր «Անքա-Բ» (ANKA-B) տիպի անօդաչու։ Այսպիսով, դրանց թիվը հասավ 6-ի։
Նշենք, որ Թուրքիայում տեղական TAI ավիաշինական ընկերության նախագծած «Անքա» անօդաչու թռչող սարքի բազային տարբերակի կառուցման աշխատանքները սկսվել են 2004 թվականից: Այն առաջին անգամ ցուցադրվել է 2010-ին: Տարիներ տևած աշխատանքից հետո՝ 2017 թ. ապրիլի վերջին, ավարտվել էին «Անքա» հարվածային ԱԹՍ-ի կրակային փորձարկումները: Այս ԱԹՍ-ի վրա տեղադրված է 6 տարբեր տրամաչափի հրթիռ, այդ թվում՝ 4 միավոր 70 մմ տրամաչափի CİRİT և 2 միավոր 160 մմ տրամաչափի UMTAS հրթիռներ:
«Անքա» ԱԹՍ-ի մարտավարատեխնիկական բնութագրերը՝
- Իրանի երկարությունը – 8մ,
- Թևերի բացվածքը – 17,3 մ,
- Գործողության շառավիղը ուղիղ տեսանելիության պայմաններում– 200 կմ,
- Թռիչքային զանգվածը – 1600 կգ,
- Վառելիքի զանգվածը – 250 կգ,
- Օգտակար բեռնատարողությունը – 200 կգ,
- Շարժիչը – 114 կՎտ հզորությամբ, 2 մխոց, տուրբո Thielert Centurion 2,0,
- Առավելագուն արագությունը – 217 կմ/ժ,
- Սովորական արագությունը – 140,7 կմ/ժ,
- Թռիչքի առաստաղը – 9144 մ,
- Թռիչքի առավելագույն տևողությունը – 24-32 ժամ,
- Բազային ռադարը – Ասելսան Սար (Aselsan Sar):
- Թևերի մակերեսը – 13,6մ²: