ԱՄՆ ղեկավարությամբ կոալիցիոն ուժերը դուրս են եկել Իրաքի մայրաքաղաք Բաղդադից 20 կմ հյուսիս տեղակայված Թաջի ռազմաբազայից և այն հանձնել Իրաքի անվտանգության ուժերին։
Այս մասին գրում է միջազգային «Reuters» լրատվական գործակալությունը։ Նշվում է, որ այս ռազմաբազայում տեղակայված են եղել կոալիցիայի 2000 զինծառայողներ, որոնց մեծ մասը բազան լքել են այս ամռանը, իսկ մնացածը կգնան իրաքյան ավտանգության ուժերին բազայի տեխնիկայի և սարքավորումների հանձնումից հետո։ Ըստ աղբյուրի սա կոալիցիոն ուժերից Իրաքին փոխանցված ութերորդ ռազմաբազան է։
Հիշեցնենք, որ իրենց երկրի տարածքից օտարերկրյա ուժերին դուրս բերելու մասին օրենքն Իրաքի խորհրդարանն ընդունեց հունվարի 5-ին՝ իրենց տարածքում ամերիկյան ավիահարվածներից Իրանի Իսլամական Հեղափոխության պահապանների կորպուսի (ԻՀՊԿ) Ղոդս ստորաբաժանման նախկին հրամանատար Ղասեմ Սոլեյմանիի սպանությունից երկու օր հետո։
Իրաքը հայտարարեց, որ երկրից պետք է դուրս բերվեն բոլոր այն ուժերը, որոնք օգնել են իրենց «Իսլամական պետության» դեմ պայքարում։