Ադրբեջանը և իսրայելական Aeronautics ընկերությունը պատրաստվում են համատեղ արտադրել Պեգասուս 120 (Pegasus 120 UAV) տեսակի բազմապտուտակային անօդաչու թռչող սարքեր։ Այս մասին հուլիսի 23-ին հայտնել է «Ջեյնս» ռազմական հանդեսը։
Ըստ աղբյուրի՝ այս տարվա հուլիսի 11-ին Ադրբեջանի ռազմարդյունաբերության փոխնախարար Յահյա Մուսաևը և Aeronautics ընկերության տնօրեն Յեդիդա Յաարին իսրայելա–ադրբեջանական Azad systems ձեռնարկության համար ստորագրել են նոր տեսակի ԱԹՍ–ների համատեղ արտադրման համաձայնության հուշագիր։
Իսրայելական Aeronautics ընկերության արդատրած Pegasus 120 տեսակի ԱԹՍ–ն․ Նկարը՝ Janes հանդեսի
Նշենք, որ Azad Systems–ը 2009թ․ Ադրբեջանի և Իսրայելի միջև կնքված համաձայնագրով Ադրբեջանում բացված ձեռնարկությունն է, որը զբաղվում է ԱԹՍ–ների արտադրությամբ։
Հավելենք, որ Pegasus 120 ԱԹՍ–ները իսրայելական ընկերությունը առաջին անգամ ներկայացրել է 2017թ հունիսին Փարիզի ավիացիոն ցուցադրության ժամանակ (Paris Air show–2017)։ Սա ընկերության առաջին բազմակոպտեր ԱԹՍ–ն է և նախատեսված է հիմնականում պաշտպանության և անվտանգության գործառույթների համար։
Հավելենք նաև, որ ուղղաթռատիպ ԱԹՍ-ները կարող են կախվել մի կետում, դրանցով ավելի հարմար է հրետանին ուղղորդել, բայց մյուս կողմից դրանք ավելի ցածր բեռնունակություն ունեն։ Ըստ այդմ՝ բազմապտուտակայիններն օրինակ ավելի հարմար են առաջնագծին ու թշնամու մերձակա թիկունքի հետախուզման և հարվածներ հասցնելու համար։