Մայիսի 31-ին Իրանի բանակի ռազմաօդային ուժերի Համադանի ավիաբազայի նոր հրամանատար է նշանակվել երկրորդ կարգի բրիգադային գեներալ Մոհամմադ Զալ Բեյգին։ Այս մասին տեղեկացնում է իրանական «Թասնիմ» լրատավական գործակալությունը։
Բեյգին այս պաշտոնում փոխարինել է Ռահման Աֆսարիին, ով ավիաբազայի հրամանատարն էր 2014թ. նոյեմբերից։
Հիշեցնենք, որ 2016թ. օգոստոսին Սիրիայում հակաահաբեկչական համագործակցության շրջանակներում Ռուսաստանը իր ռազմաօդային ուժերի Տու-22Մ3 հեռահար ռմբակոծիչներով մի քանի անգամ թռիչքներ կատարեց Համադան ավիաբազայից և հարվածներ հասցրեց Սիրիայում ԻՊ դիրքերին:
Ավիաբազայի օգտագործման մասին առաջինը հայտարարեց ռուսաստանյան կողմը՝ ներկայացնելով, թե Ռուսաստանն ինքնաթիռներ է տեղակայել Իրանում։ Սա հարուցեց իրանական կողմի զայրույթը, Թեհրանը հայտարարեց, որ Ռուսաստանը խախտել է պայմանավորվածությունը՝ հրապարակելով Համադանի ավիաբազայից ՌԴ ԶՈւ ինքնաթիռների թռիչքների մասին տեղեկությունները։ Իրանական կողմը հայտարարեց, որ Ռուսաստանը ոչ թե ինքնաթիռներ է տեղակայել Իրանի ավիաբազայում, այլ ուղղակի թռիչքներ է կատարել այնտեղից։
Արդյունքում իրանական ավիաբազայից Ռուսաստանի օդուժի թռիչքները դադարեցվեցին։
ՌԴ ՌՕՈւ Տու-22Մ3 ռմբակոծիչները իրանի Համադան ռազմաբազայում