2018-ի ապրիլի 12-ին Տավուշի Այգեձոր գյուղի երեք բնակիչ ՀՀ ՊՆ զորամասերից մեկի մարտական դիրքերի միջանկյալ տարածքում ականի պայթյունից վնասվածք են ստացել: Այս մասին հայտնում է ՀՀ Քննչական կոմիտեն:
Նախնական տվյալներով՝ 2018թ. ապրիլի 12-ին՝ ժամը 14:30-ի սահմաններում, Տավուշի մարզի Այգեձոր գյուղի երեք բնակիչ, խոտաբույսեր հավաքելու նպատակով, մտել են մարտական դիրքերի միջանկյալ տարածք, որտեղ պայթել է պայթուցիկ սարք։
Բնակիչներից մեկն ստացել է աջ բազկի ստորին երրորդի տրավմատիկ ամպուտացիա, մարմնի աջ և ձախ կեսերի բազմաթիվ բեկորային վնասվածքներ, իսկ մյուս երկուսը՝ ձախ ոտնաթաթի տրավմատիկ ամպուտացիա:
Դեպքի առթիվ հարուցվել է քրեական գործ՝ ՀՀ քրեական օրենսգրքի 376-րդ հոդվածի 2-րդ մասով (անփույթ վերաբերմունքը ծառայության նկատմամբ, եթե անզգուշությամբ առաջացրել է ծանր հետևանքներ):
Ձեռնարկվում են քննչական գործողություններ՝ դեպքի հանգամանքները պարզելու համար։
Ավելի վաղ shamshyan.com կայքը հայտնել էր, որ ականի պայթյունից վիրավորվել են Տավուշի մարզի Այգեձոր գյուղի բնակիչներ՝ 36-ամյա Նվեր Ճ-ն, 32-ամյա Աստղիկ Պ.-ն և 37-ամյա Արամ Դ.-ն։