ՀՀ ՊՆ 1-ին բանակային զորամիավորումում, մարտական պատրաստության պլանի համաձայն, ամբողջ ծավալով ընթանում են նոր ուսումնական փուլի պարապմունքներ: Այս մասին հայտնում է ՀՀ ՊՆ «Հայ Զինվոր» պաշտոնաթերթը:
Ցուցադրական պարապմունքներ 1-ին բանակային կորպուսում
Նշվում է, որ ցուցադրական պարապմունքը նախատեսված էր ջոկ-վաշտ օղակի անձնակազմերի ուսուցանման համար, սակայն թեմաներն ընտրված են եղել մարտական հրաձգությամբ անցկացվող տարբեր մակարդակների զորավարժություններում բոլոր ստորաբաժանումների անձնակազմերի գործողություններին համապատասխան՝
- վերադաս հրամանատարության կողմից ստացված մարտական խնդրի նախապատրաստումն ու անցկացումը,
- անձնակազմի տեղաբաշխումը տեղանքում,
- կապի միջոցների կիրառումը մարտական գործողությունների ժամանակ,
- ՀՄՄ-ի նշանաբերումը,
- ՀՄՄ-ի դեսանտի իջեցումը տեղում և ընթացքից,
- մարտադաշտում առաջին բուժօգնության ցուցաբերումը,
- անձնակազմի բարոյահոգեբանական վիճակի բարձրացումը:
Զորամիավորման հրամանատարի տեղակալ, գնդապետ Արտակ Մախսուդյանի գլխավորությամբ զորամիավորման զորավարժարանի հարակից տարածքում բացազատվել են մի շարք ուսումնական կետեր:
Ուսումնական կետերում պարապմունքները անցկացրել են ստորաբաժանումների ղեկավարները, ծառայությունների պետերն ու պայմանագրային զինծառայողները:
Նշենք, որ բանակային կորպուսը գլխավորում է ապրիլյան պատերազմում աչքի ընկած գնդապետ Արարատ Մելքումյան: Նա հրամանատար է նշանակվել 2018-ի փետրվարին: Մինչ այդ պաշտոնը զբաղեցնում էր գեներալ-մայոր Տիգրան Փարվանյանը: