Թուրքիան Իդլիբում՝ Սիրիայի բանակի դիրքերի մոտ 6-րդ «դիտարկման կետն» է ստեղծում

Թուրքիայի զինված ուժերի ստորաբաժանումները և զինտեխնիկայի հերթական շարասյունը անցել են թուրք-սիրիական սահմանն ու ուղևորվել Սիրիայի Իդլիբ նահանգ: Թուրքիայի զինուժը սկսում է Իդլիբում նոր «դիտարկման կետի» ստեղծման աշխատանքները: Այս մասին հայտնում է թուրքական պետական «Անադոլու» գործակալությունը:

Թուրքիայի զինուժը նոր ստորաբաժանումներ է ուղարկել Սիրիայի Իդլիբ նահանգ

Թուրքիայի զինուժը նոր ստորաբաժանումներ է ուղարկել Սիրիայի Իդլիբ նահանգ

«Դիտարկման կետերը» Թուրքիան ստեղծում է Աստանայում Սիրիայի հարցով Ռուսաստանի և Իրանի հետ համաձայնության շրջանակներում՝ Իդլիբի «ապաէսկալացման գոտու» տարածքում:

Թուրքիայի զինուժի շարասյունը տեղակայվել է Իդլիբի «ապաէսկալացման գոտու» հարավարևելքում և թուրք-սիրիական սահմանից մոտ 70 կմ հեռու գտնվող Մաարրեթ ալ-Նուման քաղաքին կից ալ-Սարման գյուղի տարածքում:

Ըստ թուրքական աղբյուրի՝ թուրքական նոր «դիտարկման կետից» ընդամենը 10 կմ հեռավորության վրա գտնվում են Սիրիայի կառավարական բանակի ստորաբաժանումները և նրանց աջակցող ուժերը:

Հիշեցնենք, որ փետրվարի սկզբին Թուրքիայի զինված ուժերը ստորաբաժանումներ, ավտոշարասյուներ է ուղարկել  Իդլիբ նահանգ՝ Հալեպից հարավ ընկած Ալ-Էիս բնակավայր՝ նոր «դիտարկման կետի» ստեղծման համար: Այդ վայրից ոչ շատ հեռու նույնպես գտնվում են կառավարական բանակի ստորաբաժանումները:

Թուրքիան Իդլիբում զինուժ տեղակայում է Աստանայում Ռուսաստանի և Իրանի հետ ձեռք բերված համաձայնությամբ: Սակայն եթե մինչ այս՝ 2017 թ. հոկտեմբերից, Անկարան սահմանափակվում էր միայն քրդերի վերահսկողության տակ գտնվող Աֆրինի հարավում զորքերի տեղակայմամբ, ապա այս դեպքում արդեն թուրքական ստորաբաժանումները բավականին խորանում են Իդլիբ նահանգում և դիրքավորվում է հենց Ասադի բանակի «քթի տակ»:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *