Դեկտեմբերին «Խաղաղության խնդիրների հետազոտման Ստոկհոլմյան ինստիտուտը» (SIPRI) հրապարակել է 2016-ին աշխարհի` 100 ամենաշատ ռազմական արտադրանք վաճառած ռազմարդյունաբերական ընկերությունների ցանկը: Թուրքական երկու ընկերություն լավագույն 100-ի շարք մտել են թարմացված՝ ավելի բարձր ցուցանիշներով: Ցանկում, ինչպես և նախորդ տարիներին, ընդգրկված են «Ասելսան» և «ԹԱԻ» ընկերությունները:
Թուրքական ԹԱԻ ընկերության արտադրության «Աթաք» հարվածային ուղղաթիռ, «Անքա» ԱԹՍ, «Հյուրքուշ» ուսումնամարտական ինքնաթիռ
«Ասելսան» ընկերությունը 2015-ի համեմատ բարձրացել է 5 հորիզոնականով` 1 մլրդ 220 մլն ռազմական արտադրանքի վաճառքով զբաղեցնելով 67-րդ հորիզոնականը: Ընկերությունը բացի այս արտահանել է նաև ոչ ռազմական արտադրանք, սակայն դա կազմել է ընդհանուր արտահանման ընդամենը 2 տոկոսը: 2016 թ. «Ասելսանի» մաքուր շահույթը կազմել է 263 մլն դոլար: Ընկերությունն ունի 5170 աշխատակից:
2015-ի համեմատ 5 հորիզոնականով բարձրացել է նաև ԹԱԻ ընկերությունը` 1 մլրդ 120 մլն ԱՄՆ դոլարի ռազմական արտադրանքի վաճառքով զբաղեցնելով 76-րդ հորիզոնականը: Ի տարբերություն «Ասելսանի»՝ ԹԱԻ-ն համեմատաբար ավելի շատ ոչ ռազմական արտադրանք է վաճառել: Ռազմական արտադրանքի վաճառքը ընդհանուր վաճառքի 86 տոկոսն է: Այս ընկերությունն ունի 5250 աշխատակից, շահույթը չի նշվում:
Երկու ընկերություններն էլ 2000-ականների սկզբի համեմատ ռազմական արտադրանքի ոլորտում հսկայական թռիչ են գրանցել: Որպես օրինակ նշենք, որ 2014 թ. «Ասելսանը» վաճառել էր 2005 թվականից ավելի քան երեք անգամ` 215%-ով ավել ռազմական արտադրանք, իսկ ԹԱԻ-ն ` ավելի քան 11 անգամ՝ 1074%-ով: Սա կապված է Թուրքիայում վերջին տասը տարում ռազմարդյունաբերության մեծ տեմպերով զարգացնելու և բանակը սեփական զինտեխնիկայով համալրելու մի շարք հավակնոտ ծրագրերի հետ:
Գրաֆիկում ներկայացված է 2016 թ. զենքի համաշխարհային վաճառքի տարաբաշխումն ըստ պետությունների: Թուրքիան ընդգրկված է «այլ» (other) բաժնում` Ավստրալիայի, Բրազիլիայի, Կանադայի, Նորվեգիայի, Լեհաստանի, Սինգապուրի, Իսպանիայի, Շվեցարիայի, Շվեդիայի, Ուկրաինայի և մի շարք այլ երկրների հետ: Միայն նշված երկրներին բաժին է ընկնում համաշխարհային զենքի վաճառքի 1 %-ից քիչ բաժինը:
2016-ին զենքի համաշխարհային վաճառքի ցուցակն ըստ երկրների
Ավելացնենք, որ ամերիկյան Defense News պարբերականը 2017 թ. հուլիսին հրապարակած ցուցակում աշխարհում ամենաշատ ռազմական արտադրանք վաճառող 100 երկրների ցանկում բացի նշվածներից ընդգրկել էր թուրքական ևս մի՝ «Ռոքեթսան» ընկերությանը: