Հունիսի 27-ին անցկացված ՀՀ ԱԱԽ նիստում չի քննարկվել Սիրիայի հետ կապված որևէ լրացուցիչ ծրագիր։ Հայաստանը Սիրիայի հիմնախնդրի լուծմանը մասնակցում է հումանիտար օգնությամբ։ Այս մասին հայտարարեց ՀՀ պաշտպանության նախարար Վիգեն Սարգսյանը։
«Խաղաղության ջերմ մաղթանքներով Հայաստանից Սիրիայի եղբայրական ժողովրդին». Հայաստանի հումանիտար օգնությունը Սիրիային
Նախարար Սարգսյանը նշեց, որ առհասարակ քննարկում չկա Հայաստանից Սիրիա բանակի ստորաբաժանումներ ուղարկելու վերաբերյալ։
Նախարարի խոսքով՝ ինքը հնարավոր է համարում պայմանների բավարարման դեպքում Սիրիա հայկական ստորաբաժանումների ուղարկումը, սակայն դրա մասին քննարկում դեռ չկա։
Հայաստանը դեպի Սիրիա հումանիտար օգնություն է ուղարկում 2017 թվականի սկզբից: Վերջին անգամ նման օգնության միանգամից երկու խմբաքանակ Սիրիա է ուղարկվել հունիսի սկզբին:
Ինչ վերաբերում է Լիբանանում հայկական խաղաղապահ զորախմբի զինծառայողների քանակի ավելացման մասին խոսակցություններին, նախարարը նշեց, որ նման ծրագիր չկա: Լիբանանում խաղաղապահների քանակը չի մեծացվում։
Ներկայում Լիբանանում ՄԱԿ-ի ՅՈՒՆԻՖԻԼ խաղաղապահ առաքելությանն ընդգրկված է ՀՀ ԶՈւ խաղաղապահ ուժերի մեկ դասակ՝ 30-32 զինծառայող կազմով: Վերջին անգամ Լիբանանում հայկական խաղաղապահ ուժերի փոխարինումը եղել է հունիսի սկզբին: