Սիրիայում սպանվել է շուրջ երկու տարի գերության մեջ գտնվող իրանցի զինծառայող Ֆերեյդուն Ահմադին։ Ֆերեյդուն Ահմադին և ևս 1 իրանցի զինծառայող գերեվարվել էին «Ֆայլաղ ալ Շամ» ահաբեկչական խմբավորման զինյալների կողմից։ Այս մասին հունիսի 2-ին հայտնում է իրանական «Ֆարս» լրատվական գործակալությունը։
Սիրիայում սպանված իրանցի զինծառայող Ֆերեյդուն Ահմադին
Իրանցիները գերեվարվել էին 2015 թվականի դեկտեմբերին՝ Հալեպի հարավ-արևմուտքում գտնվող Խան Թուման բնակավայրի ազատագրման գործողությունների ժամանակ։
Իրանը համարվում է Սիրիայի ներկայիս կառավարության դաշնակիցներից մեկը և, չնայած Սիրիայում պարբերաբար իրանցի մարտիկներ են զոհվում, այնուամենայնիվ իրանական իշխանությունները մշտապես հերքում են իրենց ռազմական ներկայությունն այդ երկրում և շեշտում, որ Իրանը Սիրիայում չունի մարտական ստորաբաժանումներ, ու իրանական կողմը Սիրիա է ուղարկում միայն ռազմական խորհրդատուներ:
Իսկ օրերս Իրանի ԱԳՆ խոսնակ Բահրամ Ղասեմին հայտարարել է, որ Իրանը պատրաստ է նաև դիտորդներ ուղարկել Սիրիա՝ հրադադարի ռեժիմի մշտադիտարկման համար: