Գերմանիայի արտգործնախարարության ներկայացուցիչներից մեկը հայտնել է, որ Գերմանիան առաջիկա երկու շաբաթվա ընթացքում վերջնական որոշում կկայացնի ստորաբաժանումը Թուրիքիայի «Ինջիրլիք» ավիաբազայում թողնելու կամ այնտեղից հանելու հարցով:
Այս մասին մայիսի 28-ին հայտնել է CNN հեռուստաընկերության կայքը:
Գերմանացի պաշտոնյան նշել է, որ իրենք բանակցություններ են վարում թուրքական կողմի հետ: Թուրքիայում գերմանական ստորաբաժանումը թողնելու կամ այնտեղից տեղափոխելու հարցը վերջնականորեն պարզ կլինի հունիսի կեսերին:
Ավելի վաղ գերմանական կողմը հայտնել էր, որ իրենք պատրաստվում են «Ինջիրլիքի» ստորաբաժանումը տեղափոխել Հորդանան, կամ տարածաշրջանի այլ երկիր:
Թուրքիան անցյալ տարվանից սկսած գերմանացի պատգամավորներին երեք անգամ չի թույլատրել այցելել «Ինջիլիք» ավիաբազա, որտեղ գերմանական զինուժի 250 զինծառայող կա: Անցյալ տարի որպես պատճառ նշվում էր Գերմանիայի խորհրդարանում Հայոց ցեղասպանության վերաբերող բանաձևի ընդունումը:
2017 թ. առիթ է ծառայել Գերմանիայի կողմից թուրք զինծառայողներին քաղաքական ապաստանի տրամադրումը: Վերջիններս Թուրքիայում մեղադրվում են ռազմական հեղաշրջման փորձին մասնակցելու, աջակցելու մեջ:
Մայիսի վերջին ՆԱՏՕ-ի գլխավոր քարտուղարը հայտնել էր, որ ինքը անձամբ կզբաղվի կառույցի անդամ երկու երկրների միջև տարաձայնությունները հարթելու հարցով: Սակայն արդեն իսկ տեղեկություններ կան, որ բանակցություններին զուգահեռ Գերմանիայի պաշտպանության նախարարը մեկնել է Հորդանան: Ամենայն հավանականությամբ քննարկվելու է հենց ռազմաբազայի հարցը: