2016 թվականի ընթացքում Իսրայելն այլ պետությունների հետ ստորագրել է զենքի արտահանման 6,5 մլրդ դոլարի պայմանագրեր, որոնց մի մասը կատարվել է տարվա ընթացքում: Այս ցուցանիշով Իսրայելն իր արտահանման ծավալը 2015 թվականի համեմատությամբ ավելացրել է 800 մլն դոլարով: Այս մասին հայտնում է DefeneNews լրատվակայքը՝ հղում անելով Իսրայելի պաշտպանության նախարարությանը։
Ըստ Իսրայելի պաշտպանության նախարարության՝ իրականացվել են բոլոր տեսակի սպառազինության արտահանումներ՝ այդ թվում նաև արդիականացման և այլ ծառայություններ:
Դրանցից միայն ինքնաթիռների արդիականացման ծրագրերը կազմել են պատվերների ողջ ծավալի 20 տոկոսը։
Իսրայելական Super Heron անօդաչու թռչող սարքը
Գնումներ են իրականացվել նաև օպտիկական հետախուզության (18%), ՀՕՊ և հրթիռային համակարգերի (15%), հետախուզության և կիբերտեխնոլոգիաների (8%), ԱԹՍ-ների (7%), կապի համակարգերի (4%) և ռազմածովային համակարգերի (1%) ոլորտներում։
Իսրայելի արտահանման հիմնական շուկան Ասիա-Խաղաղօվկիանոսյան շրջանն է, որտեղ կնքվել են 2,6 մլրդ դոլարի պայմանագրեր։ Եվրոպայում կնքվել են 1,8 մլրդ դոլարի պայմանագրեր։
Ստորև ներկայացվում է Իսրայելի տարեկան արտահանած սպառազինության գները.
2016 — 6,5 մլրդ դոլար
2015 — 5,7 մլրդ դոլար
2014 — 5,6 մլրդ դոլար
2013 — 6,6 մլրդ դոլար
2012 — 7,4 մլրդ դոլար
Ստացվում է, որ ընդհանուր առմամբ, 2012-2016 թվականներին Իսրայելն արտահանել է 31,8 մլրդ դոլարի սպառազինություն, զինտեխնիկա, ինչպես նաև ռազմական ոլորտի ծառայություններ (արդիականացում և այլն):
Հիշեցնենք, որ ըստ «Ստոկհոլմի խաղաղության միջազգային հետազոտությունների ինստիտուտի» (SIPRI) փետրվարին հրապարակած տվյալների՝ 2012-2016 թթ Իսրայելի արտահանած ամբողջ սպառազինության 13 տոկոսը բաժին է ընկնում Ադրբեջանին։
Այս թվերի համադրության արդյունքում ստանում ենք, որ անցած 5 տարիների ընթացքում Իսրայելն Ադրբեջանից գնել է 4,1 մլրդ դոլարի սպառազինություն և ռազմական ոլորտի ծառայություններ: