Թուրքիայի նախագահի խոսնակ Իբրահիմ Քալընը քննադատել է ԱՄՆ գլխավորած միջազգային կոալիցիային Ալ-Բաբի գրավման գործողություններում թուրքական զինուժին ավիացիոն օգնություն տրամադրելուց հրաժարվելու համար։ Այս մասին հայտնում է Reuters լրատվական գործակալությունը։
Թուրքիայի ԶՈւ ռազմաօդային ուժերի F-16 կործանիչներ՝ տեղակայված Քոնիայի 3-րդ ավիաբազայում
Միջազգային կոալիցիան պետք է կատարի իր պարտականությունները՝ Ալ Բաբի մարտերում մեզ ավիացիոն օգնություն ցուցաբերելով։ Ավիացիոն օգնություն տրամադրելուց հրաժարվելը անթույլատրելի է։
Հիշեցնենք, որ շուրջ 4 ամիս առաջ Թուրքիայի ԶՈւ-ն «Իսլամական պետությանը» դիմակայելու պատրվակով ներխուժեց Սիրիայի տարածք: Սեպտեմբերից գործողություններ են սկսվել Ալ-Բաբ քաղաքի ուղղությամբ, իսկ շուրջ մեկ ամիս ռազմական գործողություններն ընթանում են հենց քաղաքի մատույցներում:
Նշենք, որ Թուրքիան լրացուցիչ ուժեր է կուտակում Թուրքիայի սահմանին։ Դեկտեմբերի 25-ին Սիրիայի հետ սահման է ուղարկվել տանկերից կազմված շարասյուն, զրահափոխադրիչներ, հրետանային ինքնագնաց կայանքներ։ Միաժամանակ Սիրիա է ուղարկվել 500 հատուկջոկատային։