Նոյեմբերի 3-4-ին Իրանի իսլամական հեղափոխության պահապանների կորպուսի (ԻՀՊԿ) «Բեյթ օլ մողադաս» զորամիավորման 343 գումարտակի ներգրավմամբ զորավարժություններ են անցկացվել Իրանի 14 նահանգում: Այս մասին հայտնում է իրանական «ԻՐՆԱ» լրատվական գործակալությունը:
Զորավարժությունների ընթացքում իրականացվել են հիմնականում որոնողափրկարարական վարժանքներ, ցերեկային և գիշերային ժամերին խաղարկվել հարձակողական և պաշտպանական գործողություններ:
Զորավարժություններն անցկացվել են Իլամ, Խուզիսթան, Գիլան, Մազանդարան, Ֆարս, Սպահան, Քերման, Համադան, Ալբորզ, Լորեսթան, Ղազվին, Քերմանշահ,Շահրեքորդ և Քուրդիստան նահանգներում:
Մասնավորապես հյուսիսարևմտյան Քուրդիստան նահանգում, որտեղ Իրանը հակաահաբեկչական ակտիվ պայքար է մղում, զորավարժություններին ներգրավվել է 30 հազար զինծառայող՝ «Բեյթ օլ մողադաս» զորամիավորման 68 և «Քոսար» զորամիավորման 2 գումարտակ: Այս մասին տեղեկացնում է «Թասնիմ» լրատվական գործակալությունը:
Նկատենք, որ Քուրդիստանում միայն վերջին 3 ամիսների ընթացքում վնասազերծվել է Իրաքից Իրան ներթափանցել փորձող 14 ահաբեկիչ:
Միաժամանակ մի քանի նահանգներում անցկացվող զորավարժությունների նպատակը զինծառայողների մարտական պատրաստվածության աստիճանը բարձրացնելը, մարտավարական գործնական հմտություններն ամրապնդելն է:
Ավելի վաղ «Ալի բեյթ օլ մողադաս» և «Քոսար» զորամիավորումների 4 գումարտակների ներգրավմամբ հակաահաբեկչական պայքարի և ռազմավարական նշանակության օբյեկտների պաշտպանության թեմայով զորավարժություն էր անցկացվել մերձկասպյան Գիլան նահանգի Էնզելի քաղաքում:
Իսկ մինչև 2017թ. կեսերը զորավարժություններ են անցկացվելու երկրի բոլոր նահանգներում:
Pingback: Իրանական Բասիջը զորավարժություններ է անցկացնում երկրի 8 նահանգում | Ռազմ.info