Հունիսի 13-15-ը Հայաստանի և Չեխիայի ՊՆ ներկայացուցիչները Հայաստանում անցկացված աշխատանքային հանդիպման ժամանակ քննարկել են հայ-չեխական ռազմատեխնիկական համագործակցության մասին համաձայնագրի նախագծի նախապատրաստման ընթացքը: Այս մասին տեղեկացնում է ՀՀ ՊՆ կայքը:
Կայացել է Հայաստանի և Չեխիայի ՊՆ ներկայացուցիչների աշխատանքային հանդիպումը
Կնքվելիք համաձայնագրով նախատեսվում է համագործակցություն ռազմական արտադրանքի մատակարարման, նորոգման, արդիականացման և այլ ոլորտներում, մանրամասները՝ ստորև:
ՊՆ ներկայացուցիչների քննարկման օրակարգային հարցերից են եղել ռազմատեխնիկական բնագավառում հայկական և չեխական ձեռնարկությունների, կազմակերպությունների ու հաստատությունների համագործակցության աջակցության հարցը: Դիտարկվել է նաև Տնտեսական համագործակցության հայ-չեխական միջկառավարական հանձնաժողովի շրջանակներում ռազմատեխնիկական համագործակցության աշխատանքային խմբի ստեղծման հեռանկարը:
Չեխիայի ՊՆ ներկայացուցիչներին ՀՀ պաշտպանության նախարարությունում ընդունել են ՀՀ պաշտպանության նախարարի տեղակալ-ռազմարդյունաբերական պետական կոմիտեի նախագահ Դավիթ Փախչանյանը և ՀՀ ՊՆ պաշտպանական քաղաքականության վարչության պետ Լևոն Այվազյանը:
Հանդիպման ընթացքում կարծիքներ են փոխանակվել համագործակցության հետագա զարգացման ուղղությամբ, ստորագրվել է Արձանագրություն հանդիպման արդյունքների վերաբերյալ:
Հիշեցնենք, որ Հայաստան-Չեխիա ռազմատեխնիկական համագործակցության համաձայնագիր կնքելուն ՀՀ կառավարությունը հավանություն է տվել փետրվարի 25-ին:
Համաձայնագրի նախագծով՝ Հայաստանն ու Չեխիան ռազմատեխնիկական համագործակցության ոլորտում հայկական և չեխական ձեռնարկությունների, կազմակերպությունների և հաստատությունների հետ համագործակցելու են հետևյալ ուղղություններով.
- ռազմական նշանակության արտադրանքի մատակարարում, նորոգում, արդիականացում, շահագործում և տեխնիկական սպասարկում,
- ռազմական նշանակության թույլատրված արտադրատեսակների արտադրության կազմակերպում,
- ռազմական նշանակության արտադրանքի հետազոտում և մշակում,
- մատակարարման համար նախատեսված ռազմական նշանակության արտադրանքի որակի հսկողության ապահովում,
- ուսումնական հաստատություններում մասնագետների և տեխնիկական անձնակազմի պատրաստում՝ հաշվի առնելով կողմերի պահանջարկները և հնարավորությունները,
- ռազմատեխնիկական համագործակցության փոխադարձ հետաքրքրություն ներկայացնող այլ ուղղություններ:
ՀՀ պաշտպանության նախարարության ներկայացրած հիմնավորման համաձայն՝ կնքվելիք համաձայնագիրն իրավական հիմք է ստեղծումարդյունավետ ռազմատեխնիկական համագործակցության համար:
«Համաձայնագրի կնքումը լիովին համապատասխանում է Հայաստանի ռազմավարական շահերին և դրա իրագործումը հնարավորություն է ընձեռում Հայաստանի ազգային զինված ուժերի համար սպառազինության արդյունավետության ու հեռանկարային զարգացումների համար», — մասնավորապես նշվում է հիմնավորման մեջ:
Ավելացնենք, որ 2015-ի հոկտեմբերին ՀՀ պաշտպանության նախարար Սեյրան Օհանյանն այցելել է Չեխիա, որտեղ հանդիպել է Չեխիայի պաշտպանության նախարարին: Հանդիպման ընթացքում որպես երկկողմ համագործակցության խոստումնալից ոլորտներ են նշվել ռազմական արդյունաբերությունը, կրթությունը, բժշկությունը, իրավապահությունը, ինչպես նաև հումանիտար ականազերծումն ու կիբերանվտանգությունը: Պաշտոնական այցի ընթացքում Սեյրան Օհանյանն այցելել է նաև չեխական ռազմարդյունաբերական համալիրի ձեռնարկություններ: