Սեպտեմբերի 6-ին Իրանի բանակի ցամաքային ուժերի ավիացիայի հրամանատար Յոուսեֆ Ղորբանին հերքել է ավելի վաղ տարածված տեղեկությունները այն մասին, որ Թավրիզում այդ կառույցի ուղղաթիռ է վթարվել։ Այս մասին տեղեկացնում է իրանական «Ֆարս» լրատվական գործակալությունը։
Ըստ Ղորաբանիի՝ Թավրիզում ցամաքային ուժերի ավիացիայի Bell-214 ուղղաթիռը ուսումնական թռիչքներ իրականացնելու համար օդ է բարձրացել, սակայն օդաչուն նկատել է ուղղաթիռի անսարքությունը և հնարավոր արտակարգ իրավիճակից խուսափելու համար վայրէջք է կատարել։
Ավելի վաղ Իրանի Արևելյան Ատրպատական նահանգի Թավրիզի շրջանի ղեկավար Ռահիմ Շոհրաթիֆարը հայտնել էր, որ սեպտեմբերի 6-ին, ժամը 11։30-ին ցամաքային զորքերի ավիացիայի ուղղաթիռը տեխնիկական խնդիրների պատճառով վթարի է ենթարկվել։ Ըստ Շոհրաթիֆարի՝ վթարից ուղևորները չէին տուժել։
Նշենք, որ Իրանի ԶՈւ սպառազինությունում 50 միավոր Bell-214, 30 միավոր Bell-214C ուղղաթիռ կա։