ԱՄՆ գլխավորած միջազգային կոալիցան ժխտում է, որ ավիահարվածներ է հասցրել Սիրիայի Դեր Զոր նահանգի Ալ Բուքամալ քաղաքին։ Այս մասին մայիսի 16-ին հայտնում է Reuters լրատվական գործակալությունը՝ հղում անելով ԱՄՆ բանակի ներկայացուցիչ, գնդապետ Ռայան Դիլոնին։
Ավելի վաղ սիրիական ԶԼՄ-ները հայտնել էին, որ երկուշաբթի օրը ԱՄՆ-ն ավիահարվածներ է հասցրել Ալ-Բուքամալ քաղաքին։ «Սիրիայում Մարդու իրավունքների հարցերով դիտորդական խմբի» տվյալներով՝ ավիահարվածների հետևանքով սպանվել է 42 խաղաղ բնակիչ։
Ըստ Դիլոնի՝ կոալիցիայի ուժերը կիրակի և երկուշաբթի օրերը ավիահարվածներ չեն հասցրել քաղաքին։ Ավիահարվածների թիրախը եղել է քաղաքից 50կմ հեռավորության վրա գտնվող նավթային օբյեկտները, որոնք ԻՊ հսկողության տակ են։
Դիլոնը հավելել է, որ նշված ժամանակահատվածում քաղաքին ավիահարվածներ են հասցրել այլ երկրների ուժեր։
Սիրիայի Դեր Զոր նահանգը և հարակից շրջանները ներկայում մեծամասամբ գտնվում են ԻՊ վերահսկողության ներքո:
Միևնույն ժամանակ Սիրիայի կառավարական ուժերը հիմնականում վերահսկում են երկրի արևելյան, հարավ-արևելյան շրջանները և կտրված են Դեր Զորից: Այս տեսանկյունից նշված շրջանում վերահսկողությունը պահպանելը ռազմավարական նշանակություն ունի Սիրիայի կառավարարական ուժերի համար:
2015 թ. ԻՊ-ն պաշարել էր Դեր Զոր քաղաքը, սակայն այնտեղ գտնվող կառավարամետ ուժերը մինչ օրս կարողանում են վերահսկողությունը պահպանել փոփոխական հաջողություններով:
ԱՄՆ գլխավորած միջազգային կոալիցիան կազմավորվել է 2014-ի սեպտեմբերին, այն բանից հետո, երբ «Իսլամական պետություն» ահաբեկչական խմբավորումը կարողացավ 2014-ի հունիսի կեսերին Իրաքի կառավարական բանակից գրավել մեծությամբ երկրորդ քաղաք Մոսուլը։