Աֆղանստանում վրացի զինծառայող է զոհվել

Աֆղանստանում մարտական առաջադրանք կատարելիս առայժմ չպարզված հանգամանքերում վրացի զինծառայող է զոհվել: Զոհվածը 23-ամյա կապրալ Մինդիա Աբաշիձեն է, ով 2008 թվականից ծառայում է Աֆղանստանի Հելմանդ նահանգում: Այդ մասին հայտնում է Lenta.ru-ն` վկայակոչելով «Новости-Грузия» լրատվականին:
Վրաստանի նախագահը և պաշտպանության նախարարությունն իրենց ցավակցությունն են հայտնել զոհվածի հարազատներին: Պաշտպանության ապագա նախարար Իրակլի Ալասանիան ևս Աբաշիձեի հարազատներին իր ցավակցությունն է հայտնել (Ալասանիայի անունը նշված է նոր կառավարության թեկնածուների ցանկում)
«Կապրալ Աբաշիձեն պայքարում էր մեր Հայրենիքի և մեր երեխաների խաղաղ ապագայի համար: Իմ խորին ցավակցությունն եմ հայտնում նրա ընտանիքին»,- ասել է Ալասանիան:
Ավելի վաղ Ալասանիան հայտարարել էր, որ վրացական ուժերը կմնան Աֆղանստանում մինչ իրենց առաքելության ավարտը: Այս առումով ապագա նախարարը աջակցում էր Վրաստանի ներկայիս ղեկավարության դիրքորոշմանը:
Նշենք, որ Անվտանգության աջակցման միջազգային ուժերի կազմում ներգրավված վրացական ռազմական ուժերն Աֆղանստանում են 2009 թվականից: Ներկայումս Աֆղանստանում ծառայում է շուրջ 900 վրացի զինվորական: Միաժամանակ պաշտոնական Թբիլիսին վերջերս հայտարարել է Աֆղանստանում վրացական ուժերի կրկնապատկման մտադրության մասին:
Ըստ Վրաստանի նախագահ Միխայիլ Սաակաշվիլու` Աֆղանստան ուղարկված վրացի զինվորականներն իրենց կյանքի գնով ձեռք են բերում փորձ, որն անհրաժեշտ է Վրաստանի զարգացման համար:
Ըստ որոշ տեղեկությունների` 2009 թվականի նոյեմբերից Աֆղանստանում 18 վրացի զինծառայող է զոհվել, որոնցից յոթը` այս տարի: Վրացական վաշտը (175 զիվոր և սպա) տեղակայված է Քաբուլում` Ֆրանսիայի պատասխանատվության գոտում: Վրացի զինծառայողների ևս երկու գումարտակ (750 մարդ) տեղակայված է Հելմանդ նահանգում` ԱՄՆ պատասխանատվության գոտում: