ՆԱՏՕ խորհրդատվական խումբն այցելել է Հայաստան

Մարտի 14-17-ին հերթական այցով Երևանում էր Հայաստանի կարիքներին օժանդակելու համար ձևավորված և ՆԱՏՕ և «Գործընկերություն հանուն խաղաղության» կոնսորցիումի հովանու ներքո գործող «Պաշտպանական կրթության զարգացման» խումբը, որում ընգրկված էին ՆԱՏՕ-ի կենտրոնակայանի, Կանադայի, Չեխիայի, Լիտվայի ռազմաուսումնական հաստատությունների առաջատար փորձագետները: Այս մասին տեղեկացնում է ՀՀ ՊՆ կայքը:

Խորհրդատվական խմբի հետ քննարկումը ՀՀ ՊՆ պաշտպանական ազգային հետազոտական համալսարանում

Հայկական կողմից խորհրդատվական խմբի հետ փոխգործակցությանը ներգրաված են ՀՀ ՊՆ Դրաստամատ Կանայանի անվան ազգային ռազմավարական հետազոտությունների, Վազգեն Սարգսյանի անվան ռազմական, Մարշալ Արմենակ Խանփերյանցի անվան ռազմական ավիացիոն ինստիտուտների և Ենթասպաների դպրոցի ղեկավար և փորձագիտական կազմերը:

Այցի նպատակն է եղել ՀՀ ռազմաուսումնական հաստատությունների և պաշտպանության նախարարության կադրերի և ռազմական կրթության վարչության հետ 2015թ. համագործակցության ծրագրերի ամփոփումն ու փոխգործակցության հետագա ուղիների համաձայնեցումը:

ՀՀ պաշտպանության նախարարությունում քննարկումներում հայկական կողմը ներկայացրեց պաշտպանական կրթության ոլորտում և ռազմական ուսումնական հաստատություններում կյանքի կոչված բարեփոխումների վերաբերյալ զեկույցներ:

Շեշտը դրվեց նոր մեկնարկած դասընթացների, ուսումնական ծրագրերի վերանայման, պրոֆեսորադասախոսական կազմի վերապատրաստման, դասավանդման նոր մեթոդաբանության, ինչպես նաև ոլորտի բարեփոխումներին սատարելուն միտված օրենսդրական նախաձեռնությունների և բարձրագույն ռազմական կրթության համաեվրոպական Բոլոնյան գործընթացի դրույթները կյանքի կոչելու հարցերի վրա: Նմանատիպ զեկույցով հանդես եկավ նաև ՀՀ կրթության և գիտության նախարարության ներկայացուցիչը:

Մարտի 15-17-ին միջազգային խորհրդատվական խումբն այցելել է ռազմաուսումնական հաստատություններ և հանդիպել դրանց ղեկավարության և ուսումնական գործընթացի պատասխանատուների հետ: Վ.Սարգսյանի անվան ռազմական, Ա.Խանփերյանցի անվան ռազմական ավիացիոն ինստիտուտներում և Ենթասպաների դպրոցում ներկայացվել է խորհրդատվական խմբի օգնությամբ մեկնարկած առանձին նախագծերի ընթացքը, առաջիկա տարիների համագործակցությունը զինված ուժերի կարիքներին լավագույնս համապատասխանեցնելու նկատառումները:

ՀՀ ՊՆ Հրամանատարաշտաբային դասընթացների ունկնդիրների համար խորհրդատվական խումբը ներկայացրել է զեկուցում «Հրամանատրում առաջադրանքի միջոցով» թեմայով` կենտրոնանալով օպերատիվ մակարդակում դրա կենսագործման հարցերի վրա:

Խորհրդատվական խմբի հանդիպումը ՀՀ ՊՆ առաջին տեղակալ Դավիթ Տոնոյանի հետ

ՀՀ ՊՆ Պաշտպանական ազգային հետազոտական համալսարանում հաստատության ղեկավարը և ուսումնական գործընթացի ու հետազոտական մասի պատասխանատուները ներկայացրել են Դ.Կանայանի անվան ազգային ռազմավարական հետազոտությունների ինստիտուտի հենքի վրա համալսարանի կերպափոխման գործընթացը, համալսարանի առաքելությունը, նպատակն ու հիմնական խնդիրները: Նշվել է նաև, որ պաշտպանական ազգային հետազոտական համալսարանում զգալի տեղ է հատկացվում կիբեռանվտանգության ոլորտում ռազմավարական հետազոտություններին:

Խորհրդատվական խմբի այցն ավարտվել է մարտի 17-ին ՀՀ ՊՆ առաջին տեղակալ Դավիթ Տոնոյանի հետ հանդիպմամբ, որի ընթացքում խորհրդատվական խումբը տեղեկացրել է այցի արդյունքների մասին: Կողմերը համաձայնեցրել են 2016թ. հայկական ռազմաուսումնական հաստատությունների հետ խորհրդատվական խմբի համագործակցության կոնկրետ ծրագրեր և ուղենիշներ: Պաշտպանության նախարարի առաջին տեղակալը շնորհակալություն է հայտնել Հայաստանում պաշտպանական կրթության բարեփոխումների ջանքերին միջազգային խորհրդատվական խմբի զգալի և շարունակական աջակցության համար: