Թուրքիայի քրդաբնակ շրջաններում «Քրդստանի աշխատավորական կուսակցության» (PKK) և Թուրքիայի ուժայինների միջև բախումներում այսօր՝ նոյեմբերի 3-ին՝ ժամը 12։35-ի դրությամբ սպանվել է 1, վիրավորվել՝ 2 քաղաքացիական, ձերբակալվել է 44 բարձրաստիճան պաշտոնյա և 2 ուժային, 1 քաղաքացիական: Ռազմինֆոն հետևում է իրադարձություններին և թարմացնում օրվա լրահոսը:
Իհլաս․ Թուրքիայի հյուսիսային Զոնգուլդաք գավառում անվտանգության ուժերի հատուկ գործողության արդյունքում երկու ոստիկան է ձերբակալվել՝ ռազմական լրտեսություն իրականացնելու կասկածանքով։
Իհլաս․ Թուրքիայի Իզմիր նահանգում ռազմական լրտեսություն իրականացնելու մեղադրանքով ձերբակալված բարձրաստիճան պաշտոնյաների և ուժայինների թիվը հասել է 44-ի։ Եվս 54 հոգի հետախուզվում է։
Չորումում հարձակվել են HDP-ի շենքի վրա։ Նկարը՝ Դողան լրատվական գործակալության
Դողան․ Թուրքիայի կենտրոնական Չորում նահանգում քաղաքացիական անձը քարերով հարձակվել է «Ժողովուրդների դեմոկրատական կուսակցության» (HDP) շենքի վրա։ Ոստիկանության հատուկ գործողության արդյունքում վերջինս ձերբակալվել է։
Սամսունում երկու քաղաքացիական է վիրավորվել զինված հարձակման արդյունքում։ Նկարը՝ Իհլաս լրատվական գործակալության
Իհլաս․ Թուրքիայի հյուսիսային Սամսուն նահանգի համանուն գավառում, դեռևս անհայտ անձանց զինված հարձակման հետևանքով վիրավորվել է երկու քաղաքացիական։
IMCTV․ Թուրքիայի հարավարևելյան Հաքքարի նահանգի Յուքսեքովա գավառում թուրքական օդուժը շարունակում է հարվածել PKK-ի զինյալների հենակետերին։ Թուրքական օդուժը զինյալների դեմ հատուկ գործողությունը սկսել էր երեկ՝ նոյեմբերի 2-ին։
IMCTV․ Թուրքիայի հարավարևելյան Դիարբեքիր նահանգի Սիլվան գավառի Քոնաք թաղամասում ոստիկանական զրահապատ մեքենայից արձակված կրակոցներից սպանվել է 22-ամյա քաղաքացիական։ Գավառի մի շարք թաղամասերում պարետային ժամ է հայտարարվել։
PKK-ի զինյալները փորձում են խրամատ փորել Սիլվանի փողոցներում։ Նկարը՝ Միլիեթ պարբերականի
Միլիեթ․ Թուրքիայի հարավարևելյան Դիարբեքիր նահանգի Սիլվան գավառում բախվել են PKK-ի զինյալներն ու անվտանգության ուժերը, երբ ոստիկանությունը փորձել է խոչընդոտել Մեջսիթ և Ֆերիդում թաղամասերում զինյալների՝ խրամատ փորելու աշխատանքներին։
Դողան․ Թուրքիայի Իզմիր քաղաքում անվտանգության ուժերի հատուկ գործողության արդյունքում ձերբակալվել են շուրջ 35 բարձրաստիճան պաշտոնյաներ և ուժայիններ՝ ռազմական լրտեսություն իրականացնելու կասկածանքով։
Հիշեցնենք, որ թուրք-քրդական հարաբերությունների՝ վերջին ամիսների սրման պատճառը հուլիսի 20-ին Թուրքիայի հարավային Սուրուչ քաղաքում քրդերի դեմ ձեռնարկված ահաբեկչությունն էր, որի համար թուրքական իշխանությունները մեղադրեցին «Իսլամական Պետության» (ԻՊ) զինյալներին, իսկ քրդերը՝ նաև թուրքական իշխանություններին։ Սրան հաջորդեցին Թուրքիայում քրդերի և ԻՊ կողմնակիցների ձերբակալությունները։
Հուլիսի 23-ին ԻՊ ահաբեկիչների կրակոցներից զոհվեց թուրք-սիրիական սահմանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվեցին, ինչին ի պատասխան թուրքական օդուժը սկսեց Սիրիայում և Իրաքում հարվածել ԻՊ-ի ու նաև «Քրդստանի աշխատավորական կուսակցության» (PKK) դիրքերին:
Լրահոսը թարմացնում են Նանե Մանասյանը, Անահիտ Չալիկյանը