Թուրքիայի քրդաբնակ շրջաններում «Քրդստանի աշխատավորական կուսակցության» (PKK) և Թուրքիայի ուժայինների միջև բախումներում այսօր՝ հոկտեմբերի 20-ին՝ 19:20-ի դրությամբ սպանվել է PKK-ի 7 զինյալ, 1 քաղաքացիական, վիրավորվել է 5 ուժային, 3 քաղաքացիական, ձերբակալվել է առնվազն 22 քաղաքացիական։ Ռազմինֆոն հետևում է իրադարձություններին և թարմացնում օրվա լրահոսը:
Հյուրիյեթ. PKK-ի դեմ օդային գործողությունների ընթացքում Թուրքիայի ԶՈւ-ն երկրի Հաքքարի նահանգի Դաղլըջա գավառում ոչնչացրել է զինյալների սպառազինության պահեստներ, թաքստոցներ և այլն:
Բացի այդ, զինվորականները ձերբակալել են նաև 22 մարդու՝ ահաբեկչության նպատակով ապօրինի զենք տեղափոխելու և ահաբեկչական կազմակերպության անդամակցելու մեղադրանքներով (Թուրքիայի իշխանությունները ահաբեկչական են համարում նաև PKK-ն): Առգրավվել է Կալաշնիկովի մեկ ավտոմատ, 7,65 մմ մեկ ատրճանակ, 3 հրացան և այլ սպառազինություն:
Հյուրիյեթ. Թուրքիայի արդարադատության նախարարը հայտնել է, որ հուլիսի 20-ին Սուրուչի ահաբեկչությունից հետո մեկնարկած հակաահաբեկչական գործողությունների ընթացքում մինչ օրս PKK-ի և համակիր կազմակերպությունների հետ համագործակցության կասկածանքով ձերբակալվել է 1308 մարդ: Սրանից բացի ևս 276 հոգի ձերբակալվել է ԻՊ և Ալ-Քաիդայի հետ կապեր ունենալու կասկածանքով:
Անադոլու․ Թուրքիայի հարավարևելյան Հաքքարի նահանգի Շեմդինլի գավառում՝ Շափաթան գյուղի մոտակայքում, պայթել է PKK-ի զինյալների տեղադրած ինքնաշեն պայթուցիկ սարքը։ Երկու ուժային վիրավորվել է։
Դողան․ Թուրքիայի Քոնյա նահանգում անվտանգության ուժերի հատուկ գործողության արդյունքում ձերբակալվել են PKK-ի երիտասարդական թև YDG-H-ի 14 անդամ։
Անադոլու․ Թուրքիայի հարավարևելյան Թունջելի նահանգում ավարտվել է PKK-ի զինյալների դեմ անվտանգության ուժերի հատուկ գործողությունը։
Դողան․ Թուրքիայի հարավարևելյան Դիրաբեքիր նահանգի Սիլվան գավառում բախվել են անվտանգության ուժերն ու PKK-ի զինյալները։
IMCTV.Թուրքիայի Ստամբուլ քաղաքի Բաշըբյույուք թաղամասում անհայտ անձինք հարձակվել են քրդամետ «Ժողովուրդների դեմոկրատական կուսակցության» (HDP) մասնաշենքի վրա։
Անադոլու․ Թուրքիայի վարչապետի տեղակալ Յալչն Աքդողանը հայտարարել է, որ PKK-ն շատ լուրջ պարտություն է կրել, և որ այն այժմ խուճապի մեջ է։
«Թուրքիայում ահաբեկչությունը երկար ժամանակ քաղաքական ճնշումների, երկիրը ղեկավարելու, քաղաքական նախագիծ ստեղծելու համար օգտագործցող գործիք է եղել», — նշել է պաշտոնյան:
Անադոլու․ Թուրքիայի հարավարևելյան Դիարբեքիր նահանգի Լիջե գավառում անվտանգության ուժերի հատուկ գործողության արդյունքում PKK-ի անդամ լինելու մեղադրանքով բերման ենթարկված 29 կասկածյալներից երկուսը ձերբակալվել են: Մյուս բերման ենթարկվածների հարցաքննությունը դեռևս շարունակվում է։
Անադոլու․ Թուրքիայի արևելյան Իգդիր նահանգում անվտանգության ուժերի հատուկ գործողության արդյունքում արդարադատության հանձնաժողովի անունից գործունեություն ծավալելու մեղադրանքով բերման ենթարկված երկու քաղաքացիական է ձերբակալվել։
Իհլաս․ Թուրքիայի հարավարևելյան Հաքքարի նահանգի Չուքուրջա գավառում PKK-ի զինյալները նռնականետերով հարձակվել են գավառապետարանի վրա։
Իհլաս․ Թուրքիայի հարավարևելյան Թունջելի նահանգում անվտանգության ուժերի հատուկ գործողության արդյունքում սպանվել է PKK-ի 3 զինյալ: Ոչնչացվել է 800 կգ պայթուցիկ նյութ։
Իհլաս․ Թուրքիայի հարավարևելյան Հաքքարի նահանգի Յուքսեքովա գավառում անվտանգության ուժերի և PKK-ի զինյալների բախման արդյունքում ծանր վիրավորվել է մեկ ուժային, սպանվել 4 զինյալ:
Դողան․ Թուրքիայի հարավարևելյան Հաքքարի նահանգի Յուքսեքովա և Շեմդինլի գավառների որոշ շրջաններում հոկտեմբերի 21-ից նոյեմբերի 4-ը «ռազմական անվտանգության գոտի» է հայտարարվել։
Դողան․ Թուրքիայի Դիարբեքիր նահանգի համանուն գավառում դիմակավորված մի խումբ անձինք պայթուցիկ նյութերով հարձակվել են իշխող «Արդարություն և զարգացում» կուսակցության մասնաշենքի վրա։
Իհլաս․ Թուրքիայի հարավարևելյան Մուշ նահանգում ջրցան մեքենան բախվել է զինվորական զրհապատ մեքենայի։ Արդյունքում մահացել է մեկ քաղաքացիական, ևս մեկ քաղաքացիական և երկու ուժային վիրավորվել են։
Իհլաս․ Թուրքիայի հարավարևելյան Դիարբեքիր նահանգի Լիջե գավառում անվտանգության ուժերը հատուկ գործողություն են սկսել PKK-ի զինյալների դեմ։
Իհլաս․ Թուրքիայի հարավարևելյան Մարդին նահանգի Քզլթեփե գավառում բախվել են անվտանգության ուժերն ու ճանապարհը փակած ցուցարարները։ Վիրավորվել է երկու քաղաքացիական:
Հիշեցնենք, որ թուրք-քրդական հարաբերությունների՝ վերջին շաբաթների սրման պատճառը հուլիսի 20-ին Թուրքիայի հարավային Սուրուչ քաղաքում քրդերի դեմ ձեռնարկված ահաբեկչությունն էր, որի համար թուրքական իշխանությունները մեղադրեցին «Իսլամական Պետության» (ԻՊ) զինյալներին, իսկ քրդերը՝ նաև թուրքական իշխանություններին։ Սրան հաջորդեցին Թուրքիայում քրդերի և ԻՊ կողմնակիցների ձերբակալությունները։
Հուլիսի 23-ին ԻՊ ահաբեկիչների կրակոցներից զոհվեց թուրք-սիրիական սահմանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվեցին, ինչին ի պատասխան թուրքական օդուժը սկսեց Սիրիայում և Իրաքում հարվածել ԻՊ-ի ու նաև «Քրդստանի աշխատավորական կուսակցության» (PKK) դիրքերին:
Լրահոսը թարմացնում են Սոնա Սուքիասյանը, Նանե Մանասյանը, Անահիտ Չալիկյանը