Ադրբեջանի զինուժը հայկական դիրքերին կրակել է համազարկային կրակի ռեակտիվ համակարգով

Օգոստոսի 24-ի լույս 25-ի գիշերը և օրվա ընթացքում հայ-ադրբեջանական ուժերի շփման գծում Ադրբեջանի զինուժը հայկական դիրքերի ուղղությամբ կրակել է նաև համազարկային կրակի ռեակտիվ համակարգով: Այս մասին տեղեկացնում է ՊԲ կայքը:

Ադրբեջանի զինուժի արձակած հրթիռների բեկորները

Հրթիռի մասերից մեկի վրա երևում են դրա որոշ տվյալներ

Բացի 60, 82 և 120 մմ-ոց ականանետերից (շուրջ 110 արկ) ադրբեջանական կողմը արևելյան ուղղությամբ կիրառել է նաև թուրքական արտադրության TR-107 տիպի համազարկային կրակի ռեակտիվ համակարգ, որից արձակված արկի բեկորներն էլ ներկայացրել է ՊԲ կայքը:

Նշենք, որ համազարկային կրակի ռեակտիվ համակարգերի (ՀԿՌՀ) կիրառումն ավելի է ապակայունացնում առաջնագծի իրավիճակը և մղում հակամարտության էսկալացիայի:

Թուրքական արտադրության TR-107 համազարկային կրակի ռեակտիվ կայան. լուսանկարը արտադրող ընկերության կայքից

ՊԲ մամուլի ծառայության հաղորդագրության համաձայն՝ հայկական կողմի առաջապահ ստորաբաժանումները պատասխան կրակով ճնշել են հակառակորդին: