Ադրբեջանի ռազմաօդային ուժերի ինքնաթիռները, թուրք-ադրբեջանական TurAz Kartalı-2015 («Թուրք-ադրբեջանական արծիվ-2015») համատեղ զորավարժությանն ընդառաջ, վարժանքներ են անցկացում։ Երկրի ՊՆ կայքը հաղորդում է, որ վարժանքներին մասնակցում են Ադրբեջանի ՌՕՈւ օդաչուներ, ինժեներատեխնիկական սպասարկման ծառայողներ։
ՄիԳ-29 կործանիչ, Ադրբեջանի ՌՕՈւ
Զորավարժության ընթացքում օդաչուներն օդային մարտ են մղելու պայմանական հակառակորդի դեմ, խոցելու են օդային և ցամաքային անշարժ ու շարժական թիրախներ։
Հիշեցնենք, որ Թուրքիայի և Ադրբեջանի ռազմաօդային ուժերի TurAz Kartalı-2015 («Թուրք-ադրբեջանական արծիվ-2015») զորավարժությունը մեկնարկելու է վաղը՝ օգոստոսի 22-ին։
Դրան կմասնակցի շուրջ 30 միավոր զինտեխնիկա, այդ թվում՝ F-4E ռմբակոծիչներ, ՄիԳ-29 և F-16 կործանիչներ, Սու-25 գրոհիչներ, С-130 բեռնատար ինքնաթիռ, Մի-17 բեռնատար, Մի-35 հարվածային, UH-60 բազմանպատակային և AS532 որոնողափրկարարական ուղղաթիռներ: