Ռուսաստանի ԶՈւ ռազմածովային ուժերի սևծովյան նավատորմի ռազմանավերը զորավարժություն են անցկացրել Միջերկրական ծովում, որի ժամանակ կատարել են շարասյան ուղեկցման գործողություններ: Այս մասին օգոստոսի 14-ին լրագրողների հետ հանդիպման ժամանակ հայտնել է ՌԴ սևծովյան նավատորմի ներկայացուցիչ, առաջին կարգի կապիտան (գնդապետ) Վյաչեսլավ Տրուխաչևը:
ՌԴ ԶՈւ ռազմածովային ուժերի Սևծովյան նավատորմի «Մոսկվա» գվարդիական հրթիռային հածանավը
Զորավարժության ընթացքում ռուսաստանյան ռազմանավերը հետ են մղել պայմանական հակառակորդի օդուժի հարձակումը տարբեր բարձրությունների վրա և պատասխանել են ծովից հարձակմանը: Գործողություններին մասնակցել են 6 ռազմանավ և ևս 3 ապահովման նավ, այդ թվում՝ «Մոսկվա», «Պիտլիվի», «Միրաժ» հրթիռային նավերը:
Վարժանքների սցենարով՝ ռուսաստանյան շարասյան նավերից մեկը վնասվել է, և ռազմանավերը նաև օգնություն են ցույց տվել նավի անձնակազմին՝ միաժամանակ զենիթահրթիռային համալիրներով և հրետանիով պայքարելով օդից հարձակվող հակառակորդի դեմ: