Հունիսի 26-ին ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը կենտրոնական հավաքակայանում անցկացրել է ամառային զորակոչին նվիրված խորհրդակցություն, որին մասնակցել են զորակոչի պատասխանատու աշխատանքային խմբերը և բարձրաստիճան մի շարք զինվորականներ։ Այս մասին հայտնի է դարձել ՀՀ ՊՆ «Հայ Զինվոր» պաշտոնաթերթի՝ հուլիսի 2-ին լույս տեսած համարից։
Հրապարակման մեջ նշվում է, որ ԶՈւ գլխավոր շտաբի պետը խորհրդակցության մասնակիցներին է ներկայացրել իր նորանշանակ տեղակալ, գեներալ-լեյտենանտ Մովսես Հակոբյանին, որի պատասխանատվության ոլորտում է զորակոչի կազմակերպումն ու անցկացումը:
Յուրի Խաչատուրովը գեներալ-լեյտենանտ Մովսես Հակոբյանի, կազմզորահավաքային վարչության պետ, գեներալ-մայոր Կամո Քոչունցի, սպառազինության վարչության պետ, գեներալ-մայոր Մելս Չիլինգարյանի, հանրապետության զինվորական կոմիսար, գնդապետ Հենրիկ Մուրադյանի և ռազմաբժշկական վարչության պետ, գնդապետ Կամավոր Խաչատրյանի ուղեկցությամբ շրջայց է կատարել աշխատանքային խմբերով՝ մանրամասն տեղեկանալով զորակոչի նախապատրաստման և անցկացման աշխատանքների ընթացքին ու տվել համապատասխան հանձնարարականնե։
Դիմելով զորակոչի պատասխանատու ծառայությունների` կազմզորահավաքային, սպառազինության, ռազմաբժշկական վարչությունների, ռազմական ոստիկանության և հանրապետական զինկոմիսարիատի զինանձնակազմերին, Յուրի Խաչատուրովը շեշտել է, որ բանակի ղեկավարությունը հնարավոր ամեն բան արել և այսուհետև էլ անելու է, որպեսզի զորակոչի ամբողջ ընթացքում պահպանվի արդարության սկզբունքը: Նա պատասխանատուներին հորդորել է ձեռնպահ մնալ անազնիվ քայլերից՝ նշեկով, որ բանակի ղեկավարությունը խստագույնս հետևելու է զորակոչի անցկացման ընթացքին։
ԶՈւ ԳՇ պետը ռազմական ոստիկանության զինանձնակազմին հորդորել է ավելորդ «բծախնդրություն» հանդես չբերել և «չեղած բանից գործ չսարքել, քանի որ բանակին զինվոր տված ծնողը դրան արժանի չէ»։
Գեներալ-գնդապետ Խաչատուրովը առավել ուշադիր լինելու կոչ է արել նաև բուժանձնակազմին, կարգտադրելով, որ առողջական լուրջ խնդիրներ ունեցողը չհայտնվի բանակի շարքերում: