Հունիսի 10-ին ՀՀ մի շարք գերատեսչությունների ներկայացուցիչներ հետ ՀՀ պաշտպանության նախարար Սեյրան Օհանյանի ղեկավարությամբ անցկացվել են «Պահեստային կառավարման կետի կահավորվածությունը և աշխատանքների իրականացումը» թեմայով պարապմունքներ, որոնք նախատեսված էին 2015-ի սեպտեմբերին անցկացվելիք ռազմավարական հրամանատարաշտաբային զորավարժությունների նախապատրաստման պլանով։ Այս մասին հայտնում է ՀՀ ՊՆ կայքը։
Սեյրան Օհանյանը նշել է, որ 2015 թվականին նախատեսված է իրականացնել պաշտպանական համակարգի կատարելագործմանը միտված մի շարք միջոցառումներ և այս պարապմունքը ևս կարևոր տեղ է զբաղեցնում ռազմավարական միջոցառումների շարքում:
ՀՀ պաշտպանության նախարարը նաև ընդգծել է, որն միայն նմանաբնույթ գործնական վարժանքների շրջանակներում է հնարավոր վերհանել շտկման կարիք ունեցող հարցերը, ներդաշնակել համապատասխան գերատեսչությունների կողմից պատերազմական ժամանակահատվածում իրականացվելիք գործառույթներն ու փոխգործակցությունը:
Պարապմունքներն անցկացվել են ՀՀ սպորտի և երիտասարդության հարցերի նախարարության ենթակա կառույցներից մեկի բազայի վրա։ Միջոցառմանը ներկա են եղել Սպորտի և երիտասարդության հարցերով նախարար Գաբրիել Ղազարյանը, ՀՀ տարբեր գերատեսչությունների ներկայացուցիչներ:
Պարապմունքի նպատակն է եղել բարձրացնել համապատասխան գերատեսչությունների պաշտոնատար անձանց գիտելիքները կառավարման կետի աշխատանքների կազմակերպման գործում, վերհանել համապատասխան թերություններն ու անճշտությունները՝ հետագայում դրանք բացառելու նպատակով: