Ղրղզստանի Կանտ քաղաքի ռուսաստանյան ավիաբազայում հունիսի 2-ին սկսվել է Ռուսաստանի օդադեսանտային ուժերի և Ղրղզստանի ազգային գվարդիայի հատուկ նշանակության «Պանտերա» բրիգադի համատեղ մարտավարական զորավարժության ակտիվ փուլը: Այս մասին հայտնում է ռուսաստանյան «ՌԻԱ Նովոստի» լրատվական գործակալությունը:
Ղրղզստանի ազգային գվարդիայի զինծառայողները մայիսի 25-ին մեկնարկած ռուս-ղրղզական համատեղ զորավարժության պաշտոնական բացման արարողության ժամանակ
Առաջին գործնական վարժանքներն անցկացվելու են Կանտի ռազմական օդանավակայանում, որից հետո զորավարժության մասնակիցները նաև դեսանտային վարժանքներ են անցկացնելու լեռնային վայրերում՝ նման պայմաններում գործելու հմտությունները կատարելագործելու համար:
Հիշեցնենք, որ զորավարժությունը մեկնարկել է մայիսի 25-ին: Առաջին փուլում մասնակիցներն անցնել են մարտավարամասնագիտական պատրաստություն:
Նշենք նաև, որ ներկայումս Ղրղզստանում տեղակայված է ռուսաստանյան 4 ռազմական օբյեկտ, որոնցից առաջինը Կարակոլ քաղաքում տեղակայված փորձարկումների բազան է (պայմանագիրը կնքվել է 1993-ին), երկրոդը՝ Չալդովար գյուղի կապի հանգույցը, երրորդը՝ առանձին սեյսմիկ կայանը՝ Մայլի-Սուու քաղաքում, իսկ չորրորդը՝ 2003-ից Կանտում տեղակայված ավիաբազան: