Այսօր՝ մարտի 16-ի գիշերը, Դաղստանի 4 շրջաններում և 2 քաղաքում հակաահաբեկչական գործողությունների ռեժիմ է հայտարարվել։ Գործողությունների նպատակն է գտնել զինյալների։
Նկարը` ՏԱՍՍ լրատվական գործակալության
Այս մասին հայտնում է ռուսաստանյան «ՌԻԱ Նովոստի» լրատվական գործակալությունը՝ հղում անելով Դաղստանի ազգային հակաահաբեկչական հանձնաժողովի շտաբին։
Ինչպես հայտնում է լրատվական գործակալությունը, հակաահաբեկչական գործողությունների ռեժիմ է հայտարարվել Խասավյուրտի, Կիզիլյուրտի, Կազբեկի, Նովոլակսկիի շրջաններում, Խասավյուրտ և Կիզիլյուրտ քաղաքներում։
Նշենք, որ արդեն տևական ժամանակ է, ինչ Դաղստանում այսպիսի ռեժիմ է հայտարարվում, որի ընթացքում ոչնչացվում են զինված խմբավորումների անդամներ։
Ռեժիմ մտցնելու անհրաժեշտությունն առաջացել է այն պատճառով, որ 2015 թվականին Դաղստանում արդեն մի քանի անգամ հարձակումներ էին եղել ոստիկանության աշխատակիցների վրա։ Մասնավորապես՝ հունվարի 7-ին Խասավյուրտում անծանոթները կրակել էին ոստիկանների ուղղությամբ, ինչի հետևանքով 2 ոստիկան սպանվել էր, ևս 2-ը վիրավորվել էին։ Սպանվել էր նաև հարձակվողներից մեկը։
Նույն Խասավյուրտում հունվարի 15-ին գրանցվել էր մեկ այլ միջադեպ, որի ժամանակ սպանվել է զինված տղամարդ։ Եվս մեկ միջադեպ եղել էր հունվարի 27-ին, ոստիկանները ոչնչացրել են երկու զինյալի։
Փետրվարի 24-ին դարձյալ Խասավյուրտում (Կիզիլյուրտի հետ սահմանակից են) զինված ուղևորները կրակել էին ոստիկանների ուղղությամբ, 2 զինյալ և 1 ոստիկան սպանվել էին, զինյալներից ևս մեկը կարողացել էր թաքնվել։
Մարտի 2-ին էլ հայտնի դարձավ, որ դեռևս փետրվարի 25-ից հակաահաբեկչական գործողությունների ռեժիմ հայտարարված 4 գյուղերում հանվել է ռեժիմը։ Գործողությունների արդյունքում սպանվել է 7 զինյալ:
Տեղեկացնենք, որ Հյուսիսային Կովկասը, այդ թվում նաև՝ Դաղստանը, ահաբեկչական, ինչպես նաև նմանատիպ զինված ընդհարումների կենտրոն է դարձել, որի դեմ փորձում են պայքարել Ռուսաստանի իշխանությունները։