Արցախում մահացած զինծառայողի գործով 3 ձերբակալված կա

Դեկտեմբերի 21-ին Պաշտպանության բանակի զորամասերից մեկի մարտական հենակետում մահացած ժամկետային զինծառայող Դավիթ Քոլոյանի մահվան դեպքի առթիվ հարուցված քրեական գործով ձերբակալվել են դասակի հրամանատար, ավագ լեյտենանտ Մ.Բաբայանը և երկու շարքային զինծառայող, տեղեկացնում է ՀՀ Քննչական կոմիտեն։

Բաբայանը կասկածվում է ՀՀ քրեական օրենսգրքի 375-րդ հոդվածի 1-ին մասով, այն է՝ իշխանությունը չարաշահելը, իշխանազանցությունը կամ իշխանության անգործությունը։

Շարքային զինծառայողները կասկածվում են Քոլոյանի պատիվն ու արժանապատվությունը ստորացնելով՝ ծաղրուծանակի ենթարկելու, վիրավորելու մեջ։ Շարքային զինծառայող Սիմոնյանը ձերբակալվել է՝ ՀՀ քրեական օրենսգրքի 359-րդ հոդվածի 1-ին մասով (2 դրվագ) եւ 360-րդ հոդվածի 1-ին մասով (2 դրվագ), իսկ շարքային Չապուխյանը՝ 360-րդ հոդվածի 1-ին մասով (3 դրվագ) նախատեսված արարքներ կատարելու կասկածանքով։

Հիշեցնենք, որ 2014-ի դեկտեմբերի 21-ին՝ ժամը 10:15-ի սահմաններում ՊԲ զորամասերից մեկի մարտական դիրքքում «արթուն» հերթափոխի դիտորդի պարտականությունները կատարող ժամկետային զինծառայող, շարքային Դավիթ Հրաչյայի Քոլոյանը մահացել էր իրեն ամրակցված նռնակի պայթյունի հետևանքով ստացած մարմնական վնասվածքներից։